வாட்ஸ்அப், பேஸ்புக்கில் இனி இது கூடாது…. ஒரு லைக் போட்டாலும் ஆப்பு?…. அரசின் அதிரடி உத்தரவால் உறைந்துபோன ஊழியர்கள்….!

தமிழ்நாடு பொது சுகாதாரம் மற்றும் நோய் தடுப்பு மருந்துத்துறை வெளியிட்டுள்ள புதிய சுற்றறிக்கை அரசு ஊழியர்கள் மத்தியில் பெரும் விவாதத்தை ஏற்படுத்தியுள்ளது. கடந்த 1973-ம் ஆண்டு நடைமுறையில் உள்ள அரசு ஊழியர் நடத்தை விதிகளைச் சுட்டிக்காட்டி இந்த ஆணை பிறப்பிக்கப்பட்டுள்ளது. அதன்படி, மத்திய அல்லது மாநில அரசுகளின் கொள்கைகள், திட்டங்கள் மற்றும் நடவடிக்கைகளைச் சமூக வலைதளங்கள், ஊடகங்கள் மற்றும் மீம்ஸ்கள் மூலம் பொதுவெளியில் விமர்சிப்பதற்குத் தடை விதிக்கப்பட்டுள்ளதுடன், பிற அரசுகளுடனான நல்லுறவைப் பாதிக்கும் வகையிலான கருத்துகளைத் தெரிவிக்கக் கூடாது என்றும் கடுமையாக எச்சரிக்கப்பட்டுள்ளது.

அரசை விமர்சிக்கும் தீர்மானங்கள் அல்லது உரைகள் இடம்பெறும் எந்தவொரு அலுவல் சாராத கூட்டங்களிலும் அரசு ஊழியர்கள் பங்கேற்கக் கூடாது என்று இந்த உத்தரவில் திட்டவட்டமாகத் தெரிவிக்கப்பட்டுள்ளது. இத்துறையின் கீழ் பணிபுரியும் அனைத்து நிலை அலுவலர்கள் மற்றும் பணியாளர்கள் இந்த விதிமுறைகளைத் தவறாமல் பின்பற்றுமாறு அறிவுறுத்தப்பட்டுள்ளனர். இந்த விதிமீறல்களில் ஈடுபடுவோர் மீது சம்பந்தப்பட்ட நடத்தை விதிகளின் கீழ் துறை ரீதியான ஒழுங்கு நடவடிக்கை பாயும் என்றும் ஆணை தெளிவுபடுத்துகிறது.

தற்போது பொது சுகாதாரம் மற்றும் நோய் தடுப்பு மருந்துத்துறையில் அமல்படுத்தப்பட்டுள்ள இந்த உத்தரவு, எதிர்வரும் காலங்களில் மற்ற அரசுத் துறைகளுக்கும் விரிவுபடுத்தப்படலாம் என எதிர்பார்க்கப்படுகிறது. அரசு ஊழியர்களின் கருத்துரிமைக்கும் துறை சார்ந்த ஒழுங்கு நடவடிக்கைகளுக்கும் இடையிலான விவாதங்களை இந்தச் சுற்றறிக்கை மீண்டும் எழுப்பியுள்ளது. அரசின் கொள்கைகளைப் பாதுகாக்கும் அதேவேளையில், பணியாளர்களின் கருத்துரிமை எந்தளவுக்குக் கட்டுப்படுத்தப்படுகிறது என்பது குறித்தும் பரவலான விவாதங்கள் எழுந்துள்ளன.