நான் செய்த புண்ணியம்.. எங்க அப்பா அம்மா இருக்கும்போதே அது நடந்தது – நெகிழ்ந்த தேனிசை தென்றல் தேவா!

தமிழ் சினிமாவில் 90 களில் இசைப்புயல் ஏ ஆர் ரஹ்மான் இசை ராஜ்ஜியம் நடத்திக் கொண்டிருந்த போது தனி வழியில் சென்றவர்தான் தேனிசைத் தென்றல் தேவா. விஜய், அஜித், சூர்யா, ரஜினி, கமல் என பல முன்னணி நடிகர்களொடும், பாலச்சந்தர், பாரதிராஜா, வசந்த் என முன்னணி இயக்குனர்களோடும் பணியாற்றி பல ஹிட் பாடல்களைக் கொடுத்துள்ளார்.

சமீபகாலமாக படங்களுக்கு இசையமைக்காமல் இருந்த தேவா இப்போது மீண்டும் அறம் கோபி இயக்கும் ஒரு படத்துக்கு இசையமைக்க கமிட்டாகியுள்ளார். தேவாவின் சினிமா வாழ்க்கையில் அவர் ரஜினிக்காக இசையமைத்த அண்ணாமலை மற்றும் பாட்ஷா ஆகிய இரு படங்களும் மைல்கல்லாக அமைந்தன. அதுவரை ரஜினி – இளையராஜா காம்பினேஷன் வெற்றிக்கொடி நாட்டி வந்த நிலையில் தேவா ரஜினி படங்களுக்கு தன்  இசையால் புத்துயிர் ஊட்டினார்.

2000 களுக்குப் பிறகு இசையின் வடிவம் மாறியதாலும் புது இசையமைப்பாளர்கள் அறிமுகத்தாலும் தேவா மெல்ல மெல்ல வாய்ப்புகளை இழந்து ஓரம் கட்டப்பட்டார். பல ஆண்டுகள் காணாமல் போயிருந்த தேவா தற்போது சில படங்களுக்கு மீண்டும் இசையமைக்க ஆரம்பித்துள்ளார். அதில் அறம் இயக்குனர் கோபி நயினார் இயக்கும் படமும் ஒன்று.

இந்நிலையில் சமீபத்தில் அவர் அளித்த ஒரு நேர்காணலில் தன்னைப் பற்றி அறியாத பல சுவாரஸ்யமானத் தகவல்களைப் பகிர்ந்துள்ளார். அதில் தன்னுடைய பெற்றோரைப் பற்றி பேசும்போது நெகிழ்ச்சியானார். அவரது பேச்சில் “பலருக்கும் அவர்கள் சம்பாதித்து நல்ல நிலைக்கு வரும் போது அவங்க அப்பா அம்மா இருக்க மாட்டாங்க. பிள்ளைங்க சந்தோஷமா  வாழுறத பாக்கமுடியாமலேயே போயிருப்பாங்க. ஆனா எனக்கு அப்படி இல்ல. நான் நல்ல நிலைமைக்கு வர்றத என் அப்பா அம்மா ரெண்டு பேருமே இருந்து பார்த்தார்கள்” எனப் பேசியுள்ளார்.