“டிஃபென்ஸ் பண்ணாதீங்க.. அட்டாக் பண்ணுங்க”… ஐடி விங்கிற்கு முதல்வர் ஸ்டாலின் போட்ட ‘அட்டாக் மோடு’ ஆர்டர்…. பற்றி எரியும் அரசியல் களம்…!

சென்னையில் நடைபெற்ற திமுக தகவல் தொழில்நுட்ப அணி நிர்வாகிகள் ஆலோசனைக் கூட்டத்தில் உரையாற்றிய முதலமைச்சர் மு.க. ஸ்டாலின், சமூக வலைதளங்களில் கட்சியின் செயல்பாடுகள் குறித்து அதிரடியான அறிவுரைகளை வழங்கினார். களத்தில் உழைப்பவர்கள் கட்சியின் ‘போர் வாள்’ என்றால், இணையதளத்தில் இயங்குபவர்கள் ‘ஃபயர் வாள்’ (Fire Wall) என்று பாராட்டிய அவர், திராவிட மாடல் ஆட்சியின் சாதனைகளை மக்களிடம் கொண்டு சேர்ப்பதில் ஐடி விங்கின் பங்கு மிக முக்கியமானது என்று குறிப்பிட்டார்.

எதிர்க்கட்சிகள் பரப்பும் அவதூறுகளுக்கு வெறும் விளக்கம் அளிப்பதோடு மட்டும் நின்றுவிடாமல், அவ்வப்போது ‘அட்டாக் மோட்’ (Attack Mode) எனப்படும் ஆக்ரோஷமான பாணியைக் கையாள வேண்டும் என்று நிர்வாகிகளுக்கு அவர் அறிவுறுத்தினார். நாம் எப்போதும் தற்காப்பு ஆட்டம் (Defense) மட்டுமே ஆடக்கூடாது என்றும், சமூக வலைதளங்களில் விவாதங்களுக்கான கருப்பொருளை (Agenda) நாமே தீர்மானிக்க வேண்டும் என்றும் அவர் வலியுறுத்தினார். குறிப்பாக, பாஜக உள்ளிட்ட கட்சிகள் பரப்பும் பொய் செய்திகளை முறியடிக்கத் தயங்கக் கூடாது என்று கேட்டுக்கொண்டார்.

நவீன தமிழ்நாட்டின் வரலாற்றை திமுகதான் எழுதி வருகிறது என்று பெருமிதத்துடன் குறிப்பிட்ட ஸ்டாலின், 75 ஆண்டுகால பாரம்பரியமிக்க ஒரு இயக்கம் செய்துள்ள நற்பணிகள் இந்தியாவிற்கே வழிகாட்டியாகத் திகழ்வதாகக் கூறினார். தமிழ்நாட்டைச் சிதைக்க நினைக்கும் சக்திகள் அவதூறுகளை ஆயுதமாகப் பயன்படுத்துவதால், அவற்றைத் தவிடுபொடியாக்கி உண்மைகளை உரக்கச் சொல்ல வேண்டும் என்றும், கூட்டணிக் கட்சிகளிடையே பிளவை ஏற்படுத்த நினைக்கும் சதித்திட்டங்களை முறியடிக்க வேண்டும் என்றும் அவர் பேசினார்.

இறுதியாக, 2026 சட்டமன்றத் தேர்தலில் திமுகவின் வெற்றி உறுதி செய்யப்பட்ட ஒன்று என்றும், அந்த வெற்றியை மிகப் பெரும் சாதனையாக மாற்றும் வலிமை தகவல் தொழில்நுட்ப அணிக்கு இருப்பதாகவும் அவர் நம்பிக்கை தெரிவித்தார். இணையத்திலும் நேரடி அரசியலிலும் திமுகதான் ‘சிங்கம்’ (Lion) என்பதை நிரூபிக்க வேண்டும் என்று உற்சாகப்படுத்திய முதலமைச்சர், “வெல்வோம் ஒன்றாக” என்ற முழக்கத்துடன் தனது உரையை நிறைவு செய்தார்.