“அதே விடுதி.. அதே ரூம்”.. 2026 ரிசல்ட்டுக்கு முன்பே கொடைக்கானலில் முதல்வர் போட்ட ‘பக்கா’ பிளான்!… வெற்றி ரகசியம் இதுதானா…?

தமிழகத்தில் 2026 சட்டசபை தேர்தல் வாக்குப்பதிவு விறுவிறுப்பாக நடந்து முடிந்துள்ள நிலையில், அரசியல் களம் தற்போது அடுத்தகட்ட நகர்வுகளை நோக்கித் திரும்பியுள்ளது. கடந்த ஒரு மாத காலமாகத் தமிழகம் முழுவதும் அனல் பறக்கும் பிரச்சாரங்களை மேற்கொண்ட முதல்வர் மு.க. ஸ்டாலின், தேர்தல் பணிகளால் ஏற்பட்ட உடல் மற்றும் மன சோர்வை நீக்கத் தனது விருப்பமான இடமான கொடைக்கானலுக்குப் பயணம் மேற்கொண்டுள்ளார். மதுரை வழியாக வத்தலக்குண்டு மலைப்பாதை வழியாகச் செல்லும் அவருக்கு, திண்டுக்கல் மாவட்ட காவல்துறை சார்பில் பலத்த பாதுகாப்பு ஏற்பாடுகள் செய்யப்பட்டுள்ளன.

முதல்வரின் இந்தத் தேர்விற்குப் பின்னால் ஒரு வலுவான ‘வெற்றி சென்டிமென்ட்’ இருப்பதாக அரசியல் விமர்சகர்கள் கருதுகின்றனர். 2019 மற்றும் 2024 மக்களவைத் தேர்தல்கள், 2021 சட்டமன்றத் தேர்தல் எனப் பெரிய வெற்றிகளைச் சந்தித்த போதெல்லாம், வாக்குப்பதிவு முடிந்ததும் கொடைக்கானலின் பாம்பர்புரம் பகுதியில் உள்ள அதே நட்சத்திர விடுதியில் தங்குவதை அவர் வழக்கமாக வைத்துள்ளார். அந்த குறிப்பிட்ட அறை மற்றும் இடத்தைத் தனது “வெற்றியின் நுழைவாயிலாக” அவர் கருதுவதால், தற்போதைய தேர்தலிலும் அதே ‘வெற்றி பார்முலாவை’ அவர் பின்பற்றி வருகிறார்.

முதல்வர் ஓய்வெடுக்கும் அதே வேளையில், அவரது மனைவி துர்கா ஸ்டாலின் அவர்கள் கொடைக்கானலில் உள்ள ஆன்மீகத் தலங்களுக்குச் சென்று வழிபடத் திட்டமிட்டுள்ளார். குறிப்பாகப் பழமை வாய்ந்த பூம்பாறை குழந்தை வேலப்பர் கோயில், பெரிய மாரியம்மன் மற்றும் குறிஞ்சியாண்டவர் கோயில்களில் சிறப்புப் பூஜைகள் செய்யவுள்ளார். இந்த ஆன்மீகப் பயணம் குடும்பத்திற்கும் ஆட்சிக்கும் நன்மைகளைத் தரும் என்பது அவர்களின் நம்பிக்கையாக உள்ளது. அதேபோல், துணை முதல்வர் உதயநிதி ஸ்டாலின் அவர்களும் தனது குடும்பத்துடன் துபாய் மற்றும் ஐரோப்பிய நாடுகளுக்குச் சுற்றுலா சென்றுள்ளார்.

தேர்தல் பரபரப்புகள் அடங்கியுள்ள இந்த நேரத்தில், திமுக நிர்வாகிகள் மட்டுமல்லாது அதிமுக, பாஜக மற்றும் நாம் தமிழர் கட்சித் தலைவர்களும் ஊட்டி, ஏற்காடு, கேரளா என அமைதியான இடங்களை நோக்கி நகரத் தொடங்கியுள்ளனர். வாக்கு எண்ணிக்கை நடைபெறும் நாள் வரை நிலவும் அரசியல் அழுத்தங்களில் இருந்து விலகி, புத்துணர்ச்சி பெறுவதே இவர்களின் நோக்கமாக உள்ளது. கொடைக்கானலின் இதமான குளிர் காற்று, கடந்த காலங்களைப் போலவே இம்முறையும் முதல்வருக்கு வெற்றிக் கனியைத் தருமா என்பது மே மாதம் தெரியவரும்.