கோலாகலமாக நடந்த மிஸ் கூவாகம் அழகி போட்டி!.. 15 பேரை வீழ்த்தி முதலிடம் பிடித்த சென்னை அழகி!.. பரிசு மழையில் நனைந்த திருநங்கைகள்… !!

விழுப்புரத்தில் தென்னிந்திய திருநங்கையர் கூட்டமைப்பு சார்பில் நடைபெற்ற ‘மிஸ் கூவாகம்’ போட்டியில், கோவையைச் சேர்ந்த சூர்யா முதலிடம் பிடித்து மகுடம் சூடினார். மலேசியாவின் நிஷா இரண்டாம் இடத்தையும், புதுச்சேரியின் அனன்யா மூன்றாம் இடத்தையும் பெற்றனர். மறைந்த மூத்த திருநங்கை ராதா அம்மாளுக்கு அஞ்சலி செலுத்தித் தொடங்கப்பட்ட இந்த விழாவை, ஆதினங்கள் மற்றும் கூட்டமைப்பு நிர்வாகிகள் குத்துவிளக்கேற்றித் தொடங்கி வைத்தனர். அரசுப் பணி மற்றும் பல்வேறு துறைகளில் சாதனை படைத்த இளம் திருநங்கைகளுக்கு நடிகர்கள் மகேந்திரன், பாலா மற்றும் நடிகை ஷனம் ஷெட்டி ஆகியோர் விருதுகளையும், வெற்றியாளர்களுக்கான பரிசுத்தொகையையும் வழங்கி கௌரவித்தனர்.

இந்தப் போட்டியில் 15 திருநங்கைகள் பட்டுப்புடவை மற்றும் நவீன உடைகளில் ஒய்யாரமாக வலம் வந்தனர். இறுதிச்சுற்றுக்குத் தேர்வான 7 பேரிடம் கேட்கப்பட்ட சமூகம் சார்ந்த கேள்விகளுக்குத் திறம்படப் பதிலளித்ததன் அடிப்படையில் வெற்றியாளர்கள் அறிவிக்கப்பட்டனர். விழாவில் பேசிய ஆதினங்கள், சமுதாயத்தில் திருநங்கைகள் மீதான பார்வை நேர்மறையாக மாறி வருவதையும், அவர்களின் வாழ்க்கைத்தரம் உயர்ந்து வருவதையும் சுட்டிக்காட்டி வாழ்த்தினர். கலை நிகழ்ச்சிகளில் பாடகர் வேல்முருகன் பாடல்களுக்கு திருநங்கைகள் உற்சாகமாக ஆடிப்பாடி மகிழ்ந்தனர்.

வெற்றி பெற்ற சூர்யாவுக்கு ₹51,000, நிஷாவுக்கு ₹25,000 மற்றும் அனன்யாவுக்கு ₹11,000 பரிசாக வழங்கப்பட்டது. ஒருவருக்கொருவர் முத்தமிட்டு அன்பைப் பகிர்ந்து கொண்ட வெற்றியாளர்களின் நெகிழ்ச்சியான தருணங்கள் விழாவைச் சிறப்பித்தன. நடிகர் பாலா 10 திருநங்கைகளுக்கு நிதியுதவி வழங்கினார். தமிழகம் மட்டுமின்றி அண்டை மாநிலங்கள் மற்றும் வெளிநாடுகளிலிருந்தும் நூற்றுக்கணக்கான திருநங்கைகளும் பொதுமக்களும் கலந்து கொண்ட இந்த விழா, திருநங்கைகளின் ஒற்றுமையையும் சமூக முன்னேற்றத்தையும் பறைசாற்றும் வகையில் அமைந்தது.