“மெஜாரிட்டி இல்லை.. 100+ எதிர்க்கட்சிகள்”… விஜய்க்கு காத்திருக்கும் ‘சதுரங்க வேட்டை’… 2006-ல் கருணாநிதிக்கு ஏற்பட்ட அதே சிக்கல்…!

தமிழக அரசியல் களத்தில் ஒரு புதிய சகாப்தத்தைப் படைத்து, தனிப்பெரும் கட்சியாக உருவெடுத்துள்ள நடிகர் விஜய்யின் ‘தமிழக வெற்றிக் கழகம்’, தற்போதைய தேர்தல் முடிவுகளால் ஒரு இக்கட்டான சூழலில் தள்ளப்பட்டுள்ளது. மக்கள் செல்வாக்கு அவருக்கு வெற்றியைத் தேடித்தந்தாலும், தனிப்பெரும்பான்மை (Majority) இல்லாதது அவர் சூடியுள்ள கிரீடத்தை முட்கள் நிறைந்ததாக மாற்றியுள்ளது. ஒரு தொங்கு சட்டசபையில் மைனாரிட்டி ஆட்சியை நடத்துவது என்பது சாதாரணமான காரியமல்ல; அது ஒவ்வொரு நாளும் சட்டமன்றத்தின் தளத்தில் அரசியல் சதுரங்கத்தை மிக நேர்த்தியாக ஆட வேண்டிய கட்டாயத்தை அவருக்கு உருவாக்கியுள்ளது.

விஜய்க்கு முன்னால் இருக்கும் பிரதான சவால், அவருக்கு எதிராக அமரப்போகும் 100-க்கும் மேற்பட்ட பலம் வாய்ந்த எதிர்க்கட்சி உறுப்பினர்கள்தான். திமு‌க மற்றும் அதிமுக போன்ற பல தசாப்த கால அரசியல் அனுபவம் கொண்ட கட்சிகள், சட்ட நுணுக்கங்களையும் நிர்வாக நெளிவுசுளிவுகளையும் விரல் நுனியில் வைத்திருப்பவர்கள். பட்ஜெட் தாக்கல் செய்வது முதல் புதிய திட்டங்களைச் செயல்படுத்துவது வரை, ஒவ்வொரு முறையும் வலுவான எதிர்க்கட்சிகளின் கேள்விக் கணைகளையும் முட்டுக்கட்டைகளையும் விஜய் சந்திக்க வேண்டியிருக்கும். அனுபவம் மிக்க இந்த அரசியல் ஜாம்பவான்களைச் சட்டமன்றத்தில் எதிர்கொள்வது விஜய்க்கு ஒரு அக்னிப் பரீட்சையாகவே அமையும்.

வரலாற்றைத் திரும்பிப் பார்த்தால், 2006-ல் திமுக சந்தித்த அதே ‘மைனாரிட்டி’ நெருக்கடி இப்போது விஜய்க்கு நேர்ந்துள்ளது. அன்று கருணாநிதி தனது அரசியல் ஆளுமையால் கூட்டணிக் கட்சிகளின் “நிழல் எதிர்க்கட்சி” செயல்பாடுகளைச் சமாளித்தார். ஆனால், எவ்வித நேரடி அரசியல் அனுபவமுமற்ற விஜய்க்கு, கூட்டணிக் கட்சிகள் வைக்கும் நிபந்தனைகளும், அவர்கள் கோரும் முக்கியத் துறைகளும் பெரும் தலைவலியாக அமையக்கூடும். கூட்டணிக் கட்சிகளின் பிடியில் சிக்காமல் தனது ‘கிளீன் இமேஜ்’ பிம்பத்தைத் தக்கவைத்துக் கொள்வது அவருக்கு மிகப்பெரிய சவாலாகும்.

தேர்தல் வெற்றி என்பது வெறும் ‘ட்ரைலர்’ மட்டுமே; உண்மையான ‘மெயின் பிக்சர்’ இனிமேல்தான் தொடங்குகிறது. கூட்டணிக் கட்சிகளின் குடைச்சல்கள் ஒருபுறம், வலுவான எதிர்க்கட்சியின் வியூகங்கள் மறுபுறம் என இருமுனைத் தாக்குதல்களை விஜய் எப்படி எதிர்கொள்ளப் போகிறார் என்பதே அரசியல் ஆர்வலர்களின் எதிர்பார்ப்பாக உள்ளது. தமிழகத்தின் அடுத்த ஐந்து ஆண்டுகால அரசியல் திரைக்கதை அனல் பறக்கும் மோதல்களுடனும், திருப்பங்களுடனும் அமையப்போவது மட்டும் உறுதி.