புஷ்பா நாயகன் அல்லு அர்ஜுன் கைது.. ராஷ்மிகா முதல் வருண் தவான் வரை கொந்தளித்த பிரபலங்கள்..!

அல்லு அர்ஜுன் மற்றும் ராஷ்மிகா மந்தனா நடிப்பில் சுகுமாரின் இயக்கத்தில் உருவான புஷ்பா 2 திரைப்படம் கடந்த டிசம்பர் 5ஆம் தேதி வெளியானது. இந்த திரைப்படம் வெளியானதற்கு முதல் நாள் ஹைதராபாத்தில் சந்தியா திரையரங்கில் முதல் காட்சியை காண அல்லு அர்ஜுன் வந்தபோது ஏற்பட்ட ரசிகர்களின் கூட்ட நெரிசலில் சிக்கி 39 வயது ரேவதி என்ற பெண் பரிதாபமாக உயிரிழந்தார். இந்த விவகாரத்திற்கு வருத்தம் தெரிவித்திருந்த அல்லு அர்ஜுன் அந்த குடும்பத்திற்கு 25 லட்சம் நிதி உதவியும் அறிவித்திருந்தார். இந்த சம்பவத்தால் தெலுங்கானா போலீசார் அல்லு அர்ஜுன் மீது வழக்கு பதிவு செய்திருந்த நிலையில் நேற்று காலை அல்லு அர்ஜுனை கைது செய்தனர்.

காவல் நிலையத்திற்கு விசாரணைக்கு அழைத்துச் சென்ற அவர்கள் பிறகு அல்லு அர்ஜுன் நீதிமன்றத்திற்கு அழைத்துச் சென்ற நிலையில் 14 நாட்கள் நீதிமன்ற காவலில் வைக்க நீதிமன்றம் உத்தரவு பிறப்பித்தது. இந்த சம்பவம் தெலுங்கு திரை உலகில் பெரும் பரபரப்பை கிளப்பியுள்ள நிலையில் அல்லு அர்ஜுனுக்கு ஆதரவாக பலரும் குரல் கொடுத்து வருகிறார்கள்.

அதன்படி தெலுங்கு நடிகர் நானி அல்லு அர்ஜுனுக்கு ஆதரவு தெரிவித்து வெளியிட்டுள்ள பதிவில், அரசு அதிகாரிகள் மற்றும் ஊடகங்கள், சினிமா துறையை சார்ந்தவர்கள் விஷயத்தில் காட்டும் ஆர்வத்தை சாதாரண குடிமக்கள் மீதும் காட்ட வேண்டும். நடந்த சம்பவம் ஒரு பேரதிர்ச்சியான சம்பவம்தான். மீண்டும் இப்படி நடக்காமல் இருப்பதை நாம் உறுதி செய்ய வேண்டும். இதற்கு தனிப்பட்ட ஒருவர் மட்டுமே பொறுப்பல்ல என்று பதிவிட்டுள்ளார்.

அதனைப் போலவே ஆந்திர முன்னாள் முதல்வர் ஜெகன்மோகன் ரெட்டி, பெண்ணின் மரணம் அந்த குடும்பத்திற்கு ஈடு செய்ய முடியாத இழப்பு. அல்லு அர்ஜுன் இதற்கு வருத்தம் தெரிவித்ததுடன் குடும்பத்திற்கு ஆதரவாக நிற்பதாக கூறி பொறுப்புடன் நடந்து கொண்டார். இருந்தாலும் இந்த சம்பவத்திற்கு அவரை நேரடியாக பொறுப்பாக்குவது எப்படி நியாயம். இதை வன்மையாக கண்டிக்கிறேன் என்று பதிவிட்டுள்ளார்.

அதனைப் போலவே  ராஷ்மிகா மந்தனா வெளியிட்டுள்ள பதிவில், “இப்போது பார்ப்பதை நம்ப முடியவில்லை. நடந்த சம்பவம் துரதிர்ஷ்டவசமானதுதான். வருத்தமானதும் கூட. அதற்காக எல்லா பழியையும் தனிப்பட்ட ஒருவர் மேல் சுமத்துவது வருத்தமளிக்கிறது. இப்படியொரு நிலைமை நம்ப முடியாததாகவும் வேதனையாகவும் இருக்கிறது” என்று தெரிவித்துள்ளார். மேலும் வருண் தவான் ஆகியோரும் அல்லு அர்ஜுனுக்கு ஆதரவாக குரல் கொடுத்து வெளியிட்டுள்ள பதிவு தற்போது இணையத்தில் வைரல் ஆகி வருகிறது. மேலும் நடிகரும், முன்னாள் அமைச்சருமான சிரஞ்சீவி, விஸ்வபாரா படப்பிடிப்பை ரத்து செய்துவிட்டு அல்லு அர்ஜுன் வீட்டிற்கு சென்று ஒற்றுமையை வெளிப்படுத்தியதாக கூறப்படுகிறது.