“ஒரு சொட்டு நீர் கூட கிடையாது… “கர்நாடகா பற்றி எரியும்”…. தமிழகத்திற்கு தண்ணீர் தர முடியாது என வாட்டாள் நாகராஜ் பகிரங்க எச்சரிக்கை….!

காவிரி நீர் ஒழுங்காற்று குழு தமிழகத்திற்கு அடுத்த 15 நாட்களுக்குத் தினமும் 3,500 கனஅடி தண்ணீர் திறந்து விட கர்நாடக அரசுக்குப் பரிந்துரை செய்துள்ளது. டெல்லியில் காணொளி காட்சி வாயிலாக நடைபெற்ற இக்கூட்டத்தில் இரு மாநில அதிகாரிகளும் பங்கேற்ற நிலையில் இந்த முக்கிய முடிவு எடுக்கப்பட்டது. உச்சநீதிமன்ற உத்தரவின்படி செயல்படும் காவிரி நீர் மேலாண்மை ஆணையத்தின் வழிகாட்டுதலில் வெளியாகியுள்ள இந்தப் பரிந்துரை, காவிரி நீர்ப் பகிர்வு விவகாரத்தில் இரு மாநிலங்களுக்கும் இடையே மீண்டும் ஒரு புதிய திருப்பத்தையும் பதற்றத்தையும் ஏற்படுத்தியுள்ளது.

இந்தப் பரிந்துரைக்கு கர்நாடகாவில் உள்ள கன்னட அமைப்புகளிடையே கடும் எதிர்ப்பு கிளம்பியுள்ளது. கன்னட சலுவளி வாட்டாள் கட்சியின் தலைவர் வாட்டாள் நாகராஜ், கர்நாடகத்தில் கடும் வறட்சி நிலவுவதாகவும், அணைகளில் போதிய நீர் இல்லாத சூழலில் தமிழகத்திற்கு ஒரு சொட்டு நீரைக் கூடத் திறக்கக் கூடாது என்றும் வலியுறுத்தியுள்ளார். அம்மாநில துணை முதல்வர் டி.கே. சிவக்குமார் இதில் உறுதியாக இருக்க வேண்டும் எனக் கேட்டுக்கொண்ட அவர், மீறி நீர் திறக்கப்பட்டால் ஆயிரக்கணக்கானோர் சிறை செல்லத் தயாராக இருப்பதாகவும், மாநிலம் முழுவதும் தீவிரப் போராட்டங்கள் வெடிக்கும் என்றும் எச்சரித்துள்ளார்.

இதேபோல், கர்நாடகா ரக்சண வேதிகே அமைப்பின் தலைவர் நாராயண கவுடா, 15 நாட்களில் சுமார் 4 டி.எம்.சி தண்ணீர் வழங்குவது பெங்களூரு மற்றும் காவிரி கரையோர நகரங்களின் குடிநீர் தேவையைக் கடுமையாகப் பாதிக்கும் எனக் கவலை தெரிவித்துள்ளார். மாநில அரசு உடனடியாக காவிரி நீர் மேலாண்மை ஆணையத்தையோ அல்லது நீதிமன்றத்தையோ அணுகி இந்த உத்தரவைத் தடுத்து நிறுத்த வேண்டும் என்றும், இல்லையெனில் புரட்சிகரமான முறையில் போராட்டங்களை முன்னெடுக்க நேரிடும் என்றும் தெரிவித்துள்ளார்.

டாக்டர் ராஜ்குமார் ரசிகர் மன்றத் தலைவர் சாரா கோவிந்த் உள்ளிட்ட பல்வேறு கன்னட அமைப்புகளின் தலைவர்களும் நீர் திறப்பிற்கு எதிர்ப்பு தெரிவித்துள்ளதால், அம்மாநிலத்தில் போராட்டங்கள் தீவிரம் அடையும் அச்சம் உருவாகியுள்ளது. சட்டப்பூர்வ ஆணையங்களின் பரிந்துரைகளுக்கு கர்நாடகாவில் கிளம்பியுள்ள இந்த எதிர்ப்பின் காரணமாக, தமிழகம் – கர்நாடகா எல்லையோரப் பகுதிகளில் மீண்டும் காவிரி நீர் தொடர்பான பதற்றமான சூழல் நிலவுகிறது.