நாக்பூர் டி20: அக்சர் படேலின் விரலில் இருந்து வழிந்த ரத்தம்… மைதானத்தை விட்டு வெளியேறியதால் பரபரப்பு..!!

நாக்பூரில் நடைபெற்ற நியூசிலாந்துக்கு எதிரான முதல் டி20 போட்டியில் இந்திய அணி வெற்றி பெற்றாலும், நட்சத்திர ஆல்ரவுண்டர் அக்சர் படேல் காயமடைந்தது ரசிகர்களிடையே கவலையை ஏற்படுத்தியுள்ளது. நியூசிலாந்து இன்னிங்ஸின் 16-வது ஓவரை அக்சர் படேல் வீசினார். அப்போது டேரில் மிட்செல் அடித்த சக்திவாய்ந்த ஷாட்டைத் தனது இடது கையால் அக்சர் தடுக்க முயன்றார். பந்து பலமாக மோதியதில் அவரது கையில் காயம் ஏற்பட்டு ரத்தம் கசிந்தது. வலியால் துடித்த அவர், ஓவரை முழுமையாக முடிக்க முடியாமல் பாதியிலேயே மைதானத்தை விட்டு வெளியேறினார். அந்த ஓவரின் மீதமுள்ள 3 பந்துகளை அபிஷேக் சர்மா வீசி முடித்தார்.