“நடத்தை சந்தேகம்”… மனைவியின் கழுத்தை அறுத்துக் கொன்ற கொடூர கணவன்… தர்மபுரியில் பெரும் அதிர்ச்சி….!

தர்மபுரி மாவட்டம், பஞ்சப்பள்ளி அருகே உள்ள ஜெல்திம்மனூர் கிராமத்தில் மிகவும் அதிர்ச்சிகரமான ஒரு சம்பவம் நிகழ்ந்துள்ளது. சென்னை பூ மார்க்கெட் தொழிலாளியான பாக்கியராஜ் (38) என்பவர், தனது மனைவியின் நடத்தையில் ஏற்பட்ட சந்தேகத்தின் காரணமாக, அவரைத் துக்கிக் கொன்றுள்ளார். பாக்கியராஜ் மற்றும் நிவேதிதா (28) தம்பதியினருக்கு திருமணமாகி பத்து ஆண்டுகள் ஆகின்றன, இவர்களுக்கு இரண்டு ஆண் குழந்தைகள் உள்ளனர். கடந்த மூன்று மாதங்களாக மனைவி மீது சந்தேகம் கொண்ட பாக்கியராஜ், அடிக்கடி அவருடன் தகராறில் ஈடுபட்டு வந்துள்ளார்.

இந்தத் தகராறுகளின் விளைவாக, நிவேதிதா தனது பெற்றோர் வீட்டிற்குச் சென்றிருந்தார். உறவினர்களின் சமாதான முயற்சியால், அவர் மீண்டும் கணவர் வீட்டிற்கு அழைத்து வரப்பட்டார். இருப்பினும், பாக்கியராஜின் சந்தேகம் குறையவில்லை. கடந்த பிப்ரவரி மாதம் முதல் வாரத்தில் நிவேதிதா மீண்டும் தனது கணவருடன் வசித்து வந்த நிலையில், நேற்று அதிகாலை மீண்டும் இருவருக்கும் இடையே கடும் வாக்குவாதம் ஏற்பட்டுள்ளது.

வாக்குவாதம் முற்றிய நிலையில், ஆத்திரமடைந்த பாக்கியராஜ் கத்தியால் தனது மனைவியின் கழுத்தை அறுத்துக் கொலை செய்துள்ளார். ரத்த வெள்ளத்தில் நிவேதிதா பரிதாபமாக உயிரிழந்தார். இச்சம்பவத்திற்குப் பிறகு பாக்கியராஜ் நேராக பஞ்சப்பள்ளி காவல் நிலையத்திற்குச் சென்று சரணடைந்தார். இக்கொலை தொடர்பாக வழக்குப்பதிவு செய்துள்ள போலீசார், அவரை கைது செய்து தீவிர விசாரணை நடத்தி வருகின்றனர். இச்சம்பவம் அப்பகுதியில் பெரும் பரபரப்பையும் சோகத்தையும் ஏற்படுத்தியுள்ளது.