ரஜினி, கமலுக்கு நான் படம் பண்ண மாட்டேன்… இயக்குனர் பாலா சொன்ன ’நச்’ காரணம்!

தமிழ் சினிமாவில் தன்னுடைய கதைகளில் ரௌத்திரத்தை ஏற்றி பார்வையாளர்களை திகைத்துப் போக வைக்கும் படங்களை எடுத்தவர் இயக்குனர் பாலா. அவர் இயக்கிய சேது, பிதாமகன், நான் கடவுள் போன்ற படங்கள் அவற்றின் உருவாக்கத்தால் இன்றளவும் எட்ட முடியாத உயரத்தில் இருக்கின்றன.

அவர் படங்களில் நடித்த பின்னர்தான் விக்ரம், சூர்யா மற்றும் ஆர்யா ஆகியோர் தமிழ் சினிமாவில் குறிப்பிடத்தக்க இடத்தை பிடித்தனர். அதனால் அவர் இயக்கத்தில் நடிக்க வேண்டும் என்பதில் பல இளம் ஹீரோக்கள் ஆர்வமாக இருந்தார்கள். அவர் படங்களில் கதாநாயகர்கள் பெரிய அளவுக்கு உயர்ந்தாலும், கதாநாயகிகள் போன இடம் தெரியாமல் காணாமல் போனார்கள்.

பாலா தன்னுடைய சுயசரிதைப் புத்தகமான ‘இவன்தான் பாலா’வில் தன்னுடைய வாழ்க்கையை எந்த ஒளிவு மறைவுமின்றி பகிர்ந்துள்ளார். ஒரு போக்கிரியாக இருந்த தன்னை சினிமாதான் மனிதனாக்கியது என்று கூறியுள்ளார். அப்படி அவரை பண்படுத்தியதில் அவரின் குருநாதரான பாலு மகேந்திராவுக்கு முக்கியமானப் பங்குண்டு.

இந்நிலையில் தற்போது பாலா திரையுலகில் 25 ஆண்டுகள் நிறைவு செய்துள்ளதை அடுத்து அவருக்குப் பாராட்டு விழா சென்னையில் நேற்று நடந்தது. இந்த விழாவில் பாலாவின் நண்பர்கள் மற்றும் திரையுலகினர் பலர் கலந்துகொண்டனர்.

இதில் பாலாவுக்கு நெருக்கமான நபரும், தந்தை ஸ்தானத்தில் பாலா பார்க்கும் நடிகருமான சிவகுமார் கலந்துகொண்டு பாலாவிடம் கேள்வி கேட்டு உரையாடினார். அப்போது சிவகுமார் ரஜினி கமல் வைத்து படம் பண்ணுவியா எனக் கேட்டபோது அதற்கு பாலா சொன்ன பதில் அனைவரையும் கவர்ந்துள்ளது.

அந்த உரையாடல்

சிவகுமார்: ரஜினி கமலுக்குப் படம் பண்ணுவீர்களா?

பாலா : பண்ணமாட்டேன். அவர்கள் பாதை வேறு.. என் பாதை வேறு

சிவகுமார் : ஒருவேளை அவர்கள் உன் படத்தில் அகோரியாக நடிக்கிறேன் என்று சொன்னார்கள் என்றால்..?

பாலா : அவர்கள் சொல்ல மாட்டார்கள்.