அப்ப எல்லாம் ஹீரோக்களுக்கு வசூல் விவரமே சொல்ல மாட்டோம்.. சம்பளம் இப்படிதான் ஏத்துவாங்க?- ஏவிஎம் குகன் பகிர்ந்த தகவல்!

தமிழ் சினிமாவின் புராதனமான சினிமா ஸ்டுடியோக்களில் ஒன்று ஏவிஎம் நிறுவனம். தமிழ் சினிமா பேசத்தொடங்கியதில் இன்றுவரை சினிமா தொழிலில் அவர்கள் மூன்று தலைமுறையாக ஈடுபட்டு வருகிறார்கள். தமிழ் சினிமாவில் 40 களில் இருந்து 70 களின் இறுதிவரை தொடர்ச்சியாக படங்கள் எடுத்து இந்தியா முழுவதும் அவற்றை ரிலீஸ் செய்து வெற்றிகொடி நாட்டிய நிறுவனம் ஏவிஎம். அந்த நிறுவனத்தின் நிறுவனர் ஏ வி மெய்யப்ப செட்டியார் இறந்த போது சில ஆண்டுகள் அவர்கள் படம் தயாரிக்காமல் இருந்தனர்.

இந்நிலையில் ஒரு சிறு இடைவெளிக்குப் பிறகு மீண்டும் சினிமா தயாரிப்பில் இறங்கி செகண்ட் இன்னிங்ஸிலும் வெற்றி கண்டது. அப்போது ஏவிஎம் நிறுவனம் முரட்டுக்காளை மற்றும் சகலகலா வல்லவன் ஆகிய படங்கள் ஹிட்டானதை அடுத்து தொடர்ந்து படங்கள் தயாரித்தனர். ஆனால் சினிமா தொழிலில் ஏற்பட்ட மாற்றத்தால் ஒரு கட்டத்தில் சினிமா தயாரிப்பதை நிறுத்திவிட்டு திரைக்குப் பின்னான வேலைகளில் கவனம் செலுத்தினர். கடைசியாக அவர்கள் சிவாஜி மற்றும் அயன் போன்ற பெரிய பட்ஜெட் படங்களைத் தயாரித்த பின்னர் முழுவதுமாக திரைப்பட தயாரிப்பில் இருந்து விலகினர்.

தற்போது ஏவிஎம் ஸ்டுடியோவின் பெரும்பகுதி விற்கபட்டு குடியிருப்பு, மருத்துவமனை மற்றும் பள்ளி கல்லூரிகள் கட்டப்பட்டு விட்டன. இப்போது அவர்களின் நான்காம் தலைமுறையினரான அருணா குகன் வெப் சீரிஸ்களை தயாரித்து வருகிறார்.

இந்நிலையில் ஏவி மெய்யப்ப செட்டியாரின் மகன்களில் ஒருவரான ஏவிஎம் குகன் தங்கள் காலத்தில் இருந்த சினிமா தயாரிப்புப் பாணி பற்றியும்  வசூல் விவரங்கள் பற்றியும் பேசியுள்ளார். அதில் “அந்த காலத்தில் எல்லாம் நடிகர்களுக்கு தயாரிப்பாளர்கள் வசூல் கணக்கையே சொல்ல மாட்டார்கள். ஆனால் ஒரு படம் வெள்ளி விழா தாண்டி ஓடியது என்றால் நடிகர்கள் சம்பளத்தை ஏற்றிக் கொள்வார்கள். 75 ஆயிரம் சம்பளம் வாங்கினால் ஒரு ஹிட்டுக்குப் பிறகு அதை ஒரு லட்சமாக ஏற்றிக் கேட்பார்கள். ஆனால் படம் தோல்வி அடைந்தால் சம்பளத்தைக் குறைக்க மாட்டார்கள்’ எனக் கூறியுள்ளார்.