“விண்வெளி குளியல்… ஒரு துளி நீர் கூட மிதக்கக் கூடாது”…. வியப்பில் ஆழ்த்தும் தொழில்நுட்பம்… இந்திய வீரர் கேப்டன் சுபான்ஷு சுக்லா வெளியிட்ட வீடியோ…!

பூமியில் தலைக்குக் குளிப்பது என்பது நமக்கு மிகவும் எளிமையான ஒரு அன்றாடச் செயல். ஆனால், புவிஈர்ப்பு விசை இல்லாத சர்வதேச விண்வெளி நிலையத்தில் (ISS) இது ஒரு சவாலான அறிவியல் பரிசோதனையாகவே மாறுகிறது. இந்திய விண்வெளி வீரர் சுபான்ஷு சுக்லா, விண்வெளியில் தான் எவ்வாறு தலைமுடியைச் சுத்தம் செய்கிறார் என்பதை ஒரு சுவாரஸ்யமான காணொளி மூலம் விளக்கியுள்ளார். அங்கு தண்ணீர் பூமியைப் போல் கீழே பாயாமல், ‘பரப்பு இழுவிசை’ (Surface Tension) காரணமாகத் தலையோடு பிடிவாதமாக ஒட்டிக்கொள்வதை அவர் செயல்விளக்கத்துடன் காட்டியது பலரையும் ஆச்சரியத்தில் ஆழ்த்தியுள்ளது.

விண்வெளியில் மிதக்கும் ஒரு சிறு துளி நீர் கூட அங்கிருக்கும் உணர்திறன் மிக்க மின்னணு கருவிகளுக்குப் பெரும் ஆபத்தை விளைவிக்கும் என்பதால், விண்வெளி வீரர்கள் மிகவும் எச்சரிக்கையாகச் செயல்படுகின்றனர். சுபான்ஷு சுக்லா இதற்காக ‘அலசத் தேவையில்லாத’ (No-rinse) ஷாம்பூ மற்றும் சிறிய நீர் பைகளைப் பயன்படுத்துகிறார். மிக மெதுவாகத் தலையில் நீரை ஊற்றி, ஷாம்பூவைத் தேய்க்கும் போது உருவாகும் குமிழ்கள் காற்றில் மிதந்துவிடாமல் இருக்க வேகம் மற்றும் துல்லியம் அவசியம். இல்லையெனில், அவை விண்கலத்தின் உயிர் காக்கும் சுவாசக் கருவிகளுக்குள் (Life Support Systems) புகுந்து பாதிப்பை ஏற்படுத்தக்கூடும்.

குளித்து முடித்த பிறகு, ஈரமான தலையை ஒரு துண்டு கொண்டு துடைத்து, பின்னர் சீப்பால் சீவிக்கொள்வார். விண்வெளியில் எந்த ஒரு பொருளும் வீணடிக்கப்படுவதில்லை என்பது தான் இதன் சிறப்பம்சமே. தலைமுடி உலரும்போது காற்றில் ஆவியாகும் ஈரப்பதத்தை, விண்வெளி நிலையத்தில் உள்ள அதிநவீன ‘ஈரப்பதநீக்கிகள்’ (Dehumidifiers) உறிஞ்சிச் சேகரிக்கின்றன. இவ்வாறு சேகரிக்கப்படும் நீராவியானது சுத்திகரிக்கப்பட்டு, மீண்டும் விண்வெளி வீரர்களின் குடிநீராக மறுசுழற்சி செய்யப்படுகிறது. இந்தச் சிக்கனமான மேலாண்மை முறை விண்வெளி பயணத்தின் வாழ்வாதாரத்திற்கு மிக முக்கியமானது.

விண்வெளியில் குளிப்பது மட்டுமல்லாமல், முடி வெட்டுவதும் கூட ஒரு சவாலான பணியே. சுபான்ஷு சுக்லாவிற்கு அவரது சக அமெரிக்க விண்வெளி வீராங்கனை நிக்கோல் அயர்ஸ் முடி வெட்டிவிடும் காட்சிகள் முன்னதாகப் பகிரப்பட்டு வைரலாகின. சாதாரணமான அன்றாடச் செயல்கள் கூட விண்வெளியில் எவ்வளவு திட்டமிடலுடனும், அறிவியல் நுணுக்கத்துடனும் செய்யப்படுகின்றன என்பதைச் சுக்லாவின் இந்தப் பதிவுகள் உலகுக்கு உணர்த்துகின்றன. விண்வெளி வீரர்களின் இத்தகைய சவாலான வாழ்க்கை முறை, பொதுமக்களிடையே விண்வெளி குறித்த ஆர்வத்தை மேலும் அதிகரித்துள்ளது.