அப்பா கொடுத்த தைரியம்…! ஹார்மோன் அறுவை சிகிச்சைக்குப் பின் உருகிய அனயா… நெகிழ்ச்சியில் கிரிக்கெட் உலகம்…!!

முன்னாள் இந்திய கிரிக்கெட் வீரர் சஞ்சய் பங்கரின் மகன் ஆர்யன், ஹார்மோன் மாற்று அறுவை சிகிச்சை செய்துகொண்டு தற்போது ‘அனயா’ என்ற பெண்ணாக முழுமையாக மாறியுள்ளார். கடந்த ஒரு வருடமாகப் பல்வேறு மருத்துவ சிகிச்சைகளை மேற்கொண்டு வந்த அவர், தனது இந்த மாற்றத்தை இன்ஸ்டாகிராம் பக்கத்தில் அதிகாரப்பூர்வமாக அறிவித்துள்ளார். ஆரம்பத்தில் தனது குடும்பத்தினர் இதை ஏற்றுக்கொள்வதில் தயக்கம் காட்டிய போதிலும், இறுதியில் தனது தந்தை சஞ்சய் பங்கர் அளித்த நிபந்தனையற்ற ஆதரவும் புரிதலும் இந்த கடினமான பயணத்தைச் சாத்தியமாக்கியதாக அனயா நெகிழ்ச்சியுடன் தெரிவித்துள்ளார்.

சமூகத்தில் நிலவும் பல்வேறு கேள்விகளையும் குழப்பங்களையும் கடந்து, தனது தந்தை தனக்குத் துணையாக நின்றது மிகுந்த நன்றியுணர்வைத் தருவதாக அவர் குறிப்பிட்டுள்ளார். வளர்ச்சியும் மாற்றமும் ஒரே இரவில் நடந்துவிடாது, அதற்குப் பொறுமை தேவை என்பதைத் தனது வாழ்க்கை உணர்த்தியுள்ளதாக அனயா கூறியுள்ளார். மகனின் இந்த முடிவை ஏற்றுக்கொண்டு அவருக்குத் தோள் கொடுத்த சஞ்சய் பங்கரின் செயல், பாலின அடையாளம் குறித்துப் போராடும் பலருக்கு ஒரு முன்னுதாரணமாகப் பார்க்கப்படுகிறது. இந்த மாற்றம் தனக்கு ஒரு புதிய தொடக்கத்தைத் தந்துள்ளதாக அனயா மகிழ்ச்சி வெளியிட்டுள்ளார்.