மெஸ்ஸியையே உரசிப் பார்த்த எகிப்து… உயிர் போய் உயிர் வந்தது… 14 நிமிடங்களில் நடந்த உலகக்கோப்பை மிராக்கிள்…!

ஃபிஃபா உலகக்கோப்பை கால்பந்து வரலாற்றில் அர்ஜெண்டினா அணிக்கும், அதன் கோடிக்கணக்கான ரசிகர்களுக்கும் ஒருபோதும் மறக்க முடியாத ஒரு த்ரில்லர் அரங்கேறியுள்ளது. ரவுண்ட் ஆஃப் 16 சுற்றில் எகிப்து அணிக்கு எதிராக நடைபெற்ற போட்டியில், அர்ஜெண்டினா அணியின் தோல்வி கிட்டத்தட்ட உறுதியாகிவிட்டதாகவே கருதப்பட்டது. ரசிகர்கள் மைதானத்தில் கண்ணீருடன் நின்றிருந்த அந்த இக்கட்டான சூழலில், அடுத்த 14 நிமிடங்களில் ஒட்டுமொத்த ஆட்டத்தின் போக்கையும் அர்ஜெண்டினா வீரர்கள் தலைகீழாக மாற்றி வரலாறு படைத்துள்ளனர்.

வழக்கமாக அர்ஜெண்டினா அணிக்கு எதிராகவே இதுபோன்ற கடைசி நிமிட அதிர்ச்சிகள் நடப்பது வழக்கம். குறிப்பாக, முதல் பாதியில் கோல் அடித்து முன்னிலை பெற்றால் மட்டுமே அர்ஜெண்டினா வெல்லும் என்ற எழுதப்படாத விதியை உடைத்து, இம்முறை மரண மாஸ் கம்பேக் கொடுத்துள்ளது. போட்டியின் 15வது நிமிடத்திலேயே எகிப்தின் யாசர் இப்ராஹிம் முதல் கோல் அடித்து அர்ஜெண்டினாவை அதிரவைத்தார். அதற்குப் பதிலடியாக 17வது நிமிடத்தில் அர்ஜெண்டினாவுக்கு கிடைத்த பெனால்டி வாய்ப்பை நட்சத்திர வீரர் லியோனல் மெஸ்ஸி தவறவிட்டது ரசிகர்களிடையே பெரும் பதற்றத்தை ஏற்படுத்தியது. எகிப்தின் கோல்கீப்பர் மோஸ்தஃபாவின் அசாத்திய டிஃபென்ஸை தாண்ட முடியாமல் அர்ஜெண்டினா திணறியது.

இரண்டாவது பாதியிலும் அர்ஜெண்டினாவின் சோதனை தொடர்ந்தது. ஆட்டத்தின் 67வது நிமிடத்தில் எகிப்து அணியின் ஸிகோ இரண்டாவது கோலை அடிக்க, அர்ஜெண்டினா ரசிகர்கள் நிலைகுலைந்து போயினர். எகிப்து அணி 2-0 என்ற கணக்கில் வலுவான முன்னிலை பெற்றதுடன், அர்ஜெண்டினா பந்தை பாக்ஸிற்குள் கொண்டு வரும்போதெல்லாம் 8 வீரர்கள் அரணாக நின்று டிஃபென்ஸ் செய்தனர். இந்த பலத்த தற்காப்பு அரணை உடைக்க முடியாமல் உலக நாயகன் மெஸ்ஸியே ஒரு கட்டத்தில் செய்வதறியாது திகைத்துப் போனார்.

போட்டியின் திருப்புமுனை, 78 நிமிடங்கள் வரை எகிப்து அணி ஆதிக்கம் செலுத்திய நிலையில், 79வது நிமிடத்தில் கிறிஸ்டியன் ரொமேரோ அர்ஜெண்டினாவுக்காக முதல் கோலை அடித்து நம்பிக்கையை விதைத்தார்.

ரொமேரோ கொடுத்த உத்வேகத்தில் ஆட்டம் சூடுபிடித்தது. அடுத்த சில நிமிடங்களில், அதாவது 83வது நிமிடத்தில் மெஸ்ஸி தனது அபாரமான ஆட்டத்திறனால் ஒரு தரமான கோலை அடித்து ஆட்டத்தை 2-2 என சமநிலைக்கு கொண்டு வந்தார். மைதானமே அதிர்ந்த அந்தச் சூழலில், ஆட்டத்தின் கூடுதல் நேரத்தில் என்சோ ஃபெர்னாண்டஸ் அடித்த அசாத்திய ஹெட்டர் கோல், அர்ஜெண்டினாவிற்கு 3-2 என்ற கணக்கில் அசாத்திய வெற்றியைத் தேடிக் கொடுத்தது.

முதல் 75 நிமிடங்கள் எகிப்து அணி ஆதிக்கம் செலுத்தினாலும், கடைசி 14 நிமிடங்களில் அர்ஜெண்டினா நிகழ்த்திய இந்த அற்புதம் உலகக்கோப்பை வரலாற்றின் மிகச்சிறந்த கம்பேக்குகளில் ஒன்றாக இணைந்துள்ளது. இந்த த்ரில்லர் வெற்றியின் மூலம் அர்ஜெண்டினா அணி கம்பீரமாக காலிறுதி சுற்றுக்கு முன்னேறியுள்ளது. “உயிர் போய் உயிர் வந்தது” என்று சொல்லும் அளவிற்கு மெஸ்ஸியையே உரசிப் பார்த்த எகிப்து அணியை வீழ்த்தியதால், உலகெங்கும் உள்ள அர்ஜெண்டினா ரசிகர்கள் தற்போது நெகிழ்ச்சியிலும் பேராந்தத்திலும் மிதந்து வருகின்றனர்.