“லண்டனுக்கு எதுக்கு போனீங்க?”…. அங்க ஒரு முதலீடும் இல்லை…. முதலமைச்சர் விஜய்யை வெளுத்து வாங்கிய அண்ணாமலை….!

தமிழக முதலமைச்சர் விஜய் அண்மையில் முதலீடுகளை ஈர்ப்பதற்காக லண்டனுக்கு ஆறு நாட்கள் அரசுமுறைப் பயணம் மேற்கொண்டார். இந்த விஜயத்தின் போது, நடிகர் அஜித்குமார் பங்கேற்ற கார் பந்தயத்தைக் கொடியசைத்து தொடங்கி வைத்த அவர், ஒரே நாளில் பல்வேறு தொழிலதிபர்களைச் சந்தித்து ரூ. 15,300 கோடி அளவிலான முதலீடுகளை ஈர்த்ததாகத் தமிழக அரசு சார்பில் அதிகாரப்பூர்வமாக அறிவிக்கப்பட்டது. மேலும், முதலமைச்சரின் இந்தச் சுற்றுப்பயணம் பெரும் வெற்றியடைந்ததாகவும் தெரிவிக்கப்பட்டது.

இருப்பினும், இந்த முதலீட்டாளர்கள் சந்திப்பின் போது தமிழக தொழில் துறை அமைச்சரோ அல்லது தொழில்துறை செயலாளரோ உடன் இல்லாதது அரசியல் வட்டாரத்தில் பல்வேறு கேள்விகளையும் விவாதங்களையும் எழுப்பியுள்ளது. இது தொடர்பாக தமிழக அரசு சார்பில் விரிவான பத்திரிகையாளர் சந்திப்பு எதுவும் நடத்தப்படாததால், வெளியிடப்பட்ட அறிக்கையின் உண்மைத்தன்மை குறித்துப் பலரும் சந்தேகங்களை எழுப்பி வருகின்றனர்.

இந்த நிலையில், வீ தி லீடர்ஸ் அமைப்பின் தலைவர் அண்ணாமலை முதலமைச்சரின் இந்த லண்டன் பயணத்தைக் கடுமையாக விமர்சித்துள்ளார். “இந்தியா 4.1 டிரில்லியன் டாலர் பொருளாதாரத்துடன் வளர்ந்து வரும் வேளையில், இங்கிலாந்து 3.4 டிரில்லியன் டாலர் பொருளாதாரத்துடன் 1 சதவீத வளர்ச்சியைக் மட்டுமே கொண்டுள்ள ஒரு வீழ்ச்சியடையும் பொருளாதாரம் (Dead Economy)” என்று குறிப்பிட்ட அண்ணாமலை, அங்கு சென்று பெரிய கூட்டத்தைக் கூட்டி அரசியல் பேசுவது தேவையில்லாத ஒன்று என்று சாடியுள்ளார்.

மேலும் அவர் பேசுகையில், முதலமைச்சர் விஜய் முதலீடுகளைத் தேடி லண்டனுக்குச் செல்வதை விடுத்து, கோவை மற்றும் மதுரை போன்ற உள்ளூர் நகரங்களுக்குச் சென்று அங்குள்ள உள்நாட்டுத் தொழிலதிபர்களைச் சந்திக்க வேண்டும் எனக் கேட்டுக்கொண்டார். உள்ளூர் தொழிலதிபர்களுக்கு 50 சதவீத வரி விலக்கு அளித்து, தொழிலை விரிவுபடுத்த ஊக்குவிப்பதே உண்மையான பொருளாதார வளர்ச்சிக்கு வழிவகுக்கும் என்றும், லண்டன் பயணத்தில் ஈர்க்கப்பட்டதாகச் சொல்லப்படும் முதலீடுகள் சந்தேகத்திற்குரிய வகையிலேயே உள்ளது என்றும் அவர் தனது விமர்சனத்தில் சுட்டிக்காட்டியுள்ளார்.