திமுகவின் ‘மெகா ஊழல்’ லிஸ்ட் அவுட்… “நேருவுக்கு செக்.. ஸ்டாலினுக்கு ஷாக்”…. 2000 கோடி ஊழல் புகாரில் அண்ணாமலையின் அதிரடி அம்பலம்….!

தமிழக நகராட்சி நிர்வாகத் துறை அமைச்சர் கே.என்.நேரு மற்றும் திமுக அரசுக்கு எதிராக சுமார் 2,000 கோடி ரூபாய் அளவிலான பிரம்மாண்ட ஊழல் புகார்களை தமிழக பாஜக முன்னாள் தலைவர் அண்ணாமலை முன்வைத்துள்ளார். அமலாக்கத்துறை நடத்திய சோதனைகளின் அடிப்படையில், அரசுப் பணி நியமனங்களுக்கு 888 கோடி ரூபாயும், ஒப்பந்தங்களுக்கு 1,020 கோடி ரூபாயும், பணியிட மாற்றங்களுக்கு 365.87 கோடி ரூபாயும் லஞ்சமாகப் பெறப்பட்டதாக அண்ணாமலை குற்றம் சாட்டியுள்ளார். இது தொடர்பான விரிவான ஆதாரங்களுடன் அமலாக்கத்துறை தமிழக காவல்துறைக்கு மூன்று முறை கடிதம் எழுதியும், இதுவரை நடவடிக்கை எடுக்கப்படவில்லை என்பது பெரும் சர்ச்சையை ஏற்படுத்தியுள்ளது.

இந்த ஊழல் விவகாரம் குறித்து அண்ணாமலை வெளியிட்டுள்ள அறிக்கையில், புகைப்படங்கள், வாட்ஸ்அப் உரையாடல்கள் மற்றும் டிஜிட்டல் ஆவணங்கள் எனப் பல வலுவான ஆதாரங்கள் இருந்தும் அமைச்சர் கே.என்.நேரு மீது எப்.ஐ.ஆர் (FIR) பதிவு செய்ய தமிழக காவல்துறை தயங்குவது ஏன் என்று கேள்வி எழுப்பியுள்ளார். அரசு அதிகாரிகள் ஒரு பணியிட மாற்றத்தைப் பெறுவதற்கு 7 லட்சம் முதல் 1 கோடி ரூபாய் வரை லஞ்சம் கொடுக்கக் கட்டாயப்படுத்தப்படுவதாக அவர் தெரிவித்துள்ளார். திமுக ஆட்சியில் நிர்வாகம் முற்றிலும் சீரழிந்துவிட்டதையே இது காட்டுவதாகவும் அவர் விமர்சித்துள்ளார்.

இறுதியாக, இந்த விவகாரத்தில் முதலமைச்சர் மு.க.ஸ்டாலினின் மௌனம் குறித்துச் சாடியுள்ள அண்ணாமலை, முதலமைச்சருக்கு இரண்டே வாய்ப்புகள் தான் உள்ளதாகக் குறிப்பிட்டுள்ளார். ஒன்று, தன் தலைமையில் நடக்கும் ஊழல்களை அவர் வேண்டுமென்றே கண்டுகொள்ளாமல் இருக்க வேண்டும்; அல்லது இந்த ஊழல் முறைகேடுகளில் அவருக்கும் உடந்தை இருக்க வேண்டும் என்று அண்ணாமலை மிகக்கடுமையாகச் சாடியுள்ளார். அமலாக்கத்துறை சமர்ப்பித்துள்ள மூன்றாவது அறிக்கையின் பின்னாவது உரிய நடவடிக்கை எடுக்கப்படுமா என்ற எதிர்பார்ப்பு அரசியல் வட்டாரத்தில் எழுந்துள்ளது.