மகன் மறைவால் உடைந்த அனில் அகர்வால்….! 75% சொத்துக்களைத் தானம் செய்ய அதிரடி முடிவு…. நெகிழ வைக்கும் பின்னணி…!!

வேதாந்தா குழுமத்தின் தலைவரான அனில் அகர்வாலின் மூத்த மகன் அக்னிவேஷ் அகர்வால் (49), அமெரிக்காவில் மாரடைப்பால் காலமானார். நியூயார்க்கில் ஏற்பட்ட ஒரு விபத்தில் காயமடைந்து மருத்துவமனையில் சிகிச்சை பெற்று வந்த அவர், உடல்நிலை தேறி வந்த நிலையில் எதிர்பாராத விதமாக உயிரிழந்தார். தனது மகனின் இந்த திடீர் மறைவு தமக்கு பேரிழப்பு என்றும், இனி வரும் காலங்களில் ஆடம்பரங்களைத் தவிர்த்து மிக எளிமையான வாழ்க்கையை வாழப்போவதாகவும் அனில் அகர்வால் மிகவும் உருக்கமாகத் தெரிவித்துள்ளார்.

தனது மகனின் நினைவாகவும் அவனுக்கு அளித்த உறுதிமொழியை நிறைவேற்றவும், வேதாந்தா நிறுவனத்தின் மூலம் கிடைக்கும் வருமானத்தில் 75 சதவீதத்தை ஏழைக் குழந்தைகளின் கல்வி மற்றும் பசி ஒழிப்பு போன்ற சமூக நலத்திட்டங்களுக்கு வழங்குவதாக அவர் அறிவித்துள்ளார். இந்துஸ்தான் ஜிங்க் நிறுவனத்தின் தலைவராகப் பொறுப்பு வகித்த அக்னிவேஷ் அகர்வாலின் மறைவிற்குப் பிரதமர் உள்ளிட்ட பல முக்கியத் தலைவர்கள் இரங்கல் தெரிவித்து வருகின்றனர். கோடிக்கணக்கான சொத்துக்களைத் தானமாக வழங்க முன்வந்துள்ள அனில் அகர்வாலின் இந்த மனிதாபிமானச் செயல் அனைவரையும் நெகிழ்ச்சியில் ஆழ்த்தியுள்ளது.