“ரூ.4.18 லட்சம் கோடி அவுட்… ஒரு மாதத்திற்கு மட்டும் ரூ.28,780 கோடியா?”… ஈரானை எதிர்க்கப் போய் அமெரிக்காவிற்கு நேர்ந்த சோதனை….!

அணு ஆயுத தயாரிப்பு விவகாரத்தில் ஈரான் மீது அமெரிக்காவும் இஸ்ரேலும் இணைந்து தாக்குதல் நடத்தியதைத் தொடர்ந்து, மத்திய கிழக்கில் போர் பதற்றம் உச்சக்கட்டத்தை எட்டியது. இதற்குப் பதிலடியாக, அமெரிக்காவுக்கு ஆதரவு தெரிவித்த வளைகுடா நாடுகள் மீது ஈரான் தாக்குதல் நடத்தியதுடன், சர்வதேச அளவில் கச்சா எண்ணெய் போக்குவரத்திற்கு மிக முக்கியப் பாதையாகத் திகழும் ‘ஹார்மூஸ் நீரிணை’ப் பகுதியையும் முடக்கியது. இடையே எட்டப்பட்ட தற்காலிகப் போர் நிறுத்த ஒப்பந்தத்திற்கு பிறகும், அப்பகுதியில் செல்லும் கப்பல்கள் மீது ஈரான் தாக்குதல் நடத்தியதால், அமெரிக்கா தனது இராணுவ நடவடிக்கைகளை மீண்டும் தீவிரப்படுத்தியுள்ளது.

நீடித்து வரும் இப்போரின் காரணமாக, அமெரிக்காவிற்கு ஏற்பட்டுள்ள பொருளாதாரச் சுமை மற்றும் இராணுவச் செலவுகள் வரலாறு காணாத அளவில் உயர்ந்து வருகின்றன. இதுவரை இப்போருக்காக அமெரிக்கா செலவிட்டுள்ள மொத்தத் தொகை 43.6 பில்லியன் டாலர்களை (சுமார் ரூ.4.18 லட்சம் கோடி) எட்டியுள்ளது. இதில் ஆயுத கொள்முதல் மற்றும் பயன்பாட்டிற்காக மட்டும் 28.1 பில்லியன் டாலர்கள் (சுமார் ரூ.2.69 லட்சம் கோடி) செலவிடப்பட்டுள்ளதாக அதிர்ச்சியளிக்கும் தகவல்கள் வெளியாகியுள்ளன.

போர் முடிவுக்கு வராமல் தொடர்ந்து நீடித்து வரும் நிலையில், தற்போதைய சூழலில் அமெரிக்காவிற்குப் போருக்கான மாதாந்திரச் செலவு சராசரியாக 3 பில்லியன் டாலர்களாக (சுமார் ரூ.28,780 கோடி) உள்ளது. ஹார்மூஸ் நீரிணைப் பாதையில் நிலவும் இந்தத் தொடர் பாதுகாப்பற்ற சூழல், சர்வதேசக் கச்சா எண்ணெய் சந்தையிலும், உலகப் பொருளாதார அமைப்பிலும் பெரும் தாக்கத்தையும் அமெரிக்காவிற்குப் பெரும் தலைவலியையும் தொடர்ந்து ஏற்படுத்தி வருகிறது.