மோடியின் மாஸ்டர் பிளான்… 7 ஆண்டுகளுக்குப் பிறகு கரையைத் தொடும் ஈரானிய கப்பல்… இந்தியா வரும் மலிவு விலை ஈரான் எண்ணெய்….!

ஈரான் மற்றும் அமெரிக்காவிற்கு இடையிலான போர் பதற்றம் மத்திய கிழக்கில் உச்சத்தை எட்டியுள்ள சூழலில், சுமார் ஏழு ஆண்டுகளுக்குப் பிறகு ஈரானிலிருந்து கச்சா எண்ணெய் ஏற்றிய முதல் கப்பல் இந்தியா நோக்கி வருவது சர்வதேச அரங்கில் பெரும் கவனத்தைப் பெற்றுள்ளது. அமெரிக்காவின் பொருளாதாரத் தடைகளால் 2019 மே மாதம் முதல் நிறுத்தப்பட்டிருந்த இந்த வர்த்தகம், தற்போது நிலவும் உலகளாவிய எண்ணெய் விலை உயர்வு மற்றும் தற்போதைய அரசியல் சூழலைக் கருத்தில் கொண்டு, அமெரிக்க அதிபர் டொனால்ட் டிரம்ப் வழங்கிய தற்காலிக வரி விலக்கின் மூலம் மீண்டும் சாத்தியமாகியுள்ளது. ‘பிங் ஷுன்’ (Ping Shun) என்ற அஃப்ராமாக்ஸ் வகை கப்பல், ஈரானின் கார்க் தீவிலிருந்து சுமார் 6 லட்சம் பேரல் கச்சா எண்ணெயுடன் இந்தியாவின் வதினார் துறைமுகத்தை நோக்கிப் பயணிப்பது கப்பல் கண்காணிப்புத் தரவுகள் மூலம் உறுதி செய்யப்பட்டுள்ளது.

ஹார்முஸ் ஜலசந்தி மூடப்பட்டுள்ள இக்கட்டான நிலையில், இந்தியாவின் இந்தத் துணிச்சலான வியூகம் பொருளாதார ரீதியாக முக்கியத்துவம் வாய்ந்ததாகக் கருதப்படுகிறது. மற்ற நாடுகளை விட ஈரானிடம் இருந்து தள்ளுபடி விலையில் கச்சா எண்ணெய் கிடைப்பது, இந்தியாவின் இறக்குமதிச் செலவைக் குறைப்பதோடு உள்நாட்டு எரிபொருள் விலையைக் கட்டுக்குள் வைக்கவும் உதவும் என எதிர்பார்க்கப்படுகிறது. தடைகளைத் தாண்டி மேற்கொள்ளப்படும் இந்த வர்த்தக நடவடிக்கை, சர்வதேச அரசியலில் இந்தியாவின் தன்னாட்சி முடிவெடுக்கும் திறனையும், நாட்டின் எரிசக்தி பாதுகாப்பிற்கு அரசு அளிக்கும் முன்னுரிமையையும் பறைசாற்றுவதாக அமைந்துள்ளது.