“வாக்காளர்களுக்கு கட்டுக்கட்டாக பணம்”…. இடைத்தேர்தலில் விழுந்த பேரிடி…. தவெக மீது தேர்தல் ஆணையத்தில் அதிரடி புகார்…. அலறும் அரசியல் களம்…!

தமிழகத்தில் இரண்டு சட்டமன்றத் தொகுதிகளுக்கான இடைத்தேர்தல் பிரசாரம் உச்சக்கட்டத்தை எட்டியுள்ள நிலையில், வாக்காளர்களுக்குத் தமிழக வெற்றி கழகம் சார்பில் பண விநியோகம் செய்யப்படுவதாகக் கூறி அதிமுக சார்பில் தேர்தல் ஆணையத்திடம் அதிகாரப்பூர்வமாகப் புகார் அளிக்கப்பட்டுள்ளது. இப்புகார் மனுவை அதிமுக மாநிலங்களவை உறுப்பினரும், கட்சியின் வழக்கறிஞர் பிரிவு செயலாளருமான இன்பதுரை தேர்தல் ஆணையத்திற்கு அனுப்பி வைத்துள்ளார்.

அந்தப் புகார் மனுவில், கடந்த செப்டம்பர் 22-ஆம் தேதி செய்தி ஊடகங்களில் வெளியான தகவல்களின்படி, அச்சரப்பாக்கம் ஒன்றியத்திற்குட்பட்ட ரெட்டிப்பாளையத்தில் தவெக வேட்பாளர் மரகதம் குமரவேலுக்கு ஆதரவாக வாக்காளர்களுக்குப் பெருமளவில் பணம் வழங்கப்பட்டதாகக் குறிப்பிடப்பட்டுள்ளது. மேலும், நம்பத்தகுந்த தகவல்களின் அடிப்படையில் மதுராந்தகம் மற்றும் தாராபுரம் ஆகிய இரு முழு சட்டமன்றத் தொகுதிகளிலும் திட்டமிட்ட முறையில் சட்டவிரோத பண விநியோகம் மற்றும் வாக்காளர்களைக் கவரும் நடவடிக்கைகள் தீவிரமாக மேற்கொள்ளப்பட்டு வருவதாகவும் இன்பதுரை சுட்டிக்காட்டியுள்ளார்.

இத்தகைய நடவடிக்கைகள் சுதந்திரமான மற்றும் நியாயமான தேர்தல் நடைமுறையை நேரடியாகப் பாதிப்பதுடன், மக்கள் பிரதிநிதித்துவச் சட்டத்தின் கீழ் லஞ்சம் வழங்குதல் என்ற கடுமையான ஊழல் நடவடிக்கையாகும் என்றும் அவர் தனது கடிதத்தில் தெரிவித்துள்ளார். எனவே, மதுராந்தகம் மற்றும் தாராபுரம் தொகுதிகளில் மாவட்ட தேர்தல் அலுவலர்கள், பறக்கும் படையினர் மற்றும் கண்காணிப்புக் குழுக்களைக் கொண்டு உடனடியாகக் கள விசாரணை நடத்த வேண்டும் என்றும், ஊடக ஒளிபரப்புகள், சிசிடிவி காட்சிகள் போன்ற ஆதாரங்களை அதிகாரிகள் உடனடியாகப் பாதுகாத்து வைக்க உத்தரவிட வேண்டும் என்றும் வலியுறுத்தியுள்ளார்.

மேலும், சம்பந்தப்பட்ட வேட்பாளர் மற்றும் கட்சியின் வங்கிக் கணக்குகள் மற்றும் பிரசார செலவினங்களைத் தணிக்கை செய்து, கணக்கில் காட்டப்படாத பரிவர்த்தனைகளைக் கண்டறிய வேண்டும் என்றும் மனுவில் தெரிவிக்கப்பட்டுள்ளது. இத்தகைய சட்டவிரோத செயல்களில் ஈடுபட்ட அனைவர் மீதும் பின்னணியைப் பொருட்படுத்தாமல் எஃப்.ஐ.ஆர் (FIR) பதிவு செய்து கடுமையான குற்றவியல் நடவடிக்கை எடுப்பதுடன், பதற்றம் நிறைந்த பகுதிகளில் பறக்கும் படைகள் மற்றும் சோதனைச் சாவடிகளின் கண்காணிப்பைத் தீவிரப்படுத்த வேண்டும் என்றும் அதிமுக தரப்பில் கேட்டுக்கொள்ளப்பட்டுள்ளது.