“அதிமுக 70%.. திமுக 70%”…. தவெகவுக்கு விழுந்த பலத்த அடி… வேட்பாளர் சத்யபாமாவின் வண்டவாளத்தை வெளுத்து வாங்கிய டாக்டர் பொன்ராஜ்…!

அரசியல் விமர்சகர் டாக்டர் பொன்ராஜ் தனியார் தொலைக்காட்சி ஒன்றுக்கு அளித்த பேட்டியில், தமிழக இடைத்தேர்தல் கள நிலவரங்கள் குறித்தும், தவெகவின் அரசியல் நகர்வுகள் குறித்தும் கடுமையான விமர்சனங்களை முன்வைத்துள்ளார். தாராபுரத்தில் தவெக பிரச்சாரத்திற்கு வரும் மக்கள் அனைவருமே வெளியூர்களிலிருந்து அழைத்து வரப்படுபவர்கள் என்றும், அங்குள்ள உள்ளூர் மக்கள் யாரும் பங்கேற்பதில்லை என்றும் அவர் சுட்டிக்காட்டியுள்ளார். மேலும், 40 சதவீத ஓட்டு வங்கியை உறுதியாகக் கொண்டுள்ள அதிமுகவின் பலமான கோட்டையாக தாராபுரம் விளங்குவதாகவும், அங்கு தவெக வெற்றி பெறுவது மிகவும் கடினம் என்றும் தனது பேட்டியில் அழுத்தமாகப் பதிவு செய்துள்ளார்.

சத்யபாமாவின் கட்சி மாற்றத்தைக் கடுமையாகச் சாடிய பொன்ராஜ், போட்டியிட வாய்ப்பளித்த கட்சிக்கும் வாக்களித்த மக்களுக்கும் துரோகம் செய்துவிட்டு அவர் தற்போது நீலிக்கண்ணீர் வடிப்பதாகக் குற்றம்சாட்டினார். ரூ. 50 கோடி குதிரைப்பரேரம் மூலம் பெற்றுக்கொண்டே அவர் கட்சி மாறியதாக மக்களே நேரடியாகக் குற்றம்சாட்டுவதாகவும், பதவியேற்ற 10 நாட்களுக்குள் கட்சி மாற வேண்டிய அவசியம் என்ன என்றும் கேள்வி எழுப்பினார். எம்.ஜி.ஆர் உருவாக்கிய அதிமுகவை அழித்துவிட்டு, பாஜகவின் ஆதரவோடு தவெகவை வளர்க்கவே விஜய் முயல்வதாகவும், எம்.ஜி.ஆர் மற்றும் ஜெயலலிதாவுக்கு இணையாகத் தன்னை பாவித்துக்கொண்டு பேசுவதாகவும் அவர் சாடினார்.

திமுக மற்றும் அதிமுக ஆகிய இரு முக்கிய கட்சிகளையும் கண்டு தவெக அஞ்சுவதாகவும், இந்த இரு கட்சிகளும் இணைந்தால் 70 சதவீத வாக்குகளைப் பெற்று தவெகவை முழுமையாக வீழ்த்திவிடும் என்ற பயம் அவர்களுக்கு வந்துவிட்டது என்றும் பொன்ராஜ் குறிப்பிட்டார். 100 நாட்களில் இழந்த செல்வாக்கை மீட்டெடுக்கவே பாஜகவும் தவெகவும் இந்த இடைத்தேர்தலைப் பயன்படுத்துவதாகவும், தாராபுரத்தில் ஓட்டுக்கு ரூ. 500 முதல் ரூ. 5,000 வரை பணப்பட்டுவாடா நடப்பதாக வீடியோக்கள் வெளியான பின்னரும் தேர்தல் ஆணையத்தின் பறக்கும் படை நடவடிக்கை எடுக்காமல் மௌனம் காப்பதாகவும் சாடினார்.

இறுதியாக, தாராபுரம் மற்றும் மதுராந்தகம் ஆகிய இரு தொகுதிகளிலுமே தவெகவை மக்கள் முற்றிலும் புறக்கணித்து காலி செய்துவிடுவார்கள் என்று பொன்ராஜ் நம்பிக்கை தெரிவித்தார். தாராபுரத்தில் திமுகவின் வாக்குகள் அதிமுகவுக்குச் சென்றால் அங்கு அதிமுக 70 சதவீத வாக்குகளுடன் உறுதியாக வெற்றி பெறும் என்றும், அதேபோல அதிமுகவின் வாக்குகள் திமுகவுக்குச் சென்றால் மதுராந்தகத்தில் திமுக பெருவாரியான வாக்குகளில் வெற்றி பெறும் என்றும் கூறி, இரு தொகுதிகளிலும் தவெக தோற்பது உறுதி எனத் தனது பேட்டியை நிறைவு செய்தார்.