சேது படத்துக்குப் பின் அந்த நடிகருக்கு எந்த படத்திலும் வாய்ப்புத்தராத இயக்குனர் பாலா… அதுக்குக் காரணம் இதுதானாம்!

தமிழ் சினிமாவில் தன்னுடைய கதைகளில் ரௌத்திரத்தை ஏற்றி பார்வையாளர்களை திகைத்துப் போக வைக்கும் படங்களை எடுத்தவர் இயக்குனர் பாலா. அவர் இயக்கிய சேது, பிதாமகன், நான் கடவுள் போன்ற படங்கள் அவற்றின் உருவாக்கத்தால் இன்றளவும் எட்ட முடியாத உயரத்தில் இருக்கின்றன.

அவர் படங்களில் நடித்த பின்னர்தான் விக்ரம், சூர்யா மற்றும் ஆர்யா ஆகியோர் தமிழ் சினிமாவில் குறிப்பிடத்தக்க இடத்தை பிடித்தனர். அதனால் அவர் இயக்கத்தில் நடிக்க வேண்டும் என்பதில் பல இளம் ஹீரோக்கள் ஆர்வமாக இருந்தார்கள். அவர் படங்களில் கதாநாயகர்கள் பெரிய அளவுக்கு உயர்ந்தாலும், கதாநாயகிகள் போன இடம் தெரியாமல் காணாமல் போனார்கள்.

இயக்குனர் பாலாவுக்கு சமீபகாலமாக திரைவாழ்க்கை சிறப்பாக அமையவில்லை. அவர் இயக்கிய தாரை தப்பட்டை படம் அட்டர் ப்ளாப் ஆனது. வர்மா படம் அவர் இயக்கியது பிடிக்கவில்லை என்று மீண்டும் வேறொரு இயக்குனரால் இயக்கப்பட்டது. அதே போல சூர்யாவை வைத்து அவர் முதலில் இயக்கிய வணங்கான் படத்தில் இருந்து வெளியேறினார். இதையடுத்து அருண் விஜய்யை வைத்து அவர் வணங்கான் படத்தை ரிலீஸ் செய்துள்ளார். அந்த படம் சுமாரான வெற்றியைப் பெற்றுள்ளது.

பாலா இயக்கிய சேது படத்தில் ஒரு முக்கியமான வேடத்தில் நடித்தவர் ஸ்ரீமன். அந்த படம் அவரது திரைவாழ்க்கையில் ஒரு திருப்புமுனைப் படம் என்றே சொல்லலாம். ஆனால் அதன் பிறகு பாலா இயக்கிய எந்த படத்திலும் ஸ்ரீமன் நடிக்கவில்லை. இதுபற்றி ஸ்ரீமனே ஒரு நேர்காணலில் பேசியுள்ளார்.

அதில் ‘நானே இந்த கேள்வியை ஒருமுறை பாலாவிடம் கேட்டேன். அதற்கு அவர் ‘சேது படத்தில் உனக்கு அப்படி ஒரு கதாபாத்திரம் கொடுத்துவிட்டு அடுத்தடுத்த படங்களில் சாதாரண வேடம் கொடுத்தால் நல்லா இருக்காது. கண்டிப்பாக ஒரு நல்ல வேடம் வரும்போது கொடுக்கிறேன்” எனக் கூறினார்” என தெரிவித்துள்ளார்.