அடகடவுளே..! உயிரைவிட வருகைப்பதிவு முக்கியமா?… வெள்ளத்தில் டயரில் மிதந்து சென்ற ஆசிரியர்கள்… இணையத்தை உலுக்கும் வீடியோ…!!

மத்தியப் பிரதேச மாநிலம் பிந்த் மாவட்டத்தில், அரசுப் பள்ளி ஆசிரியர்கள் தங்களது உயிரைப் பணயம் வைத்து வெள்ளம் பெருக்கெடுத்து ஓடும் ஆற்றை டயர் டியூப்கள் உதவியுடன் கடந்து செல்லும் அதிர்ச்சியூட்டும் சம்பவம் வெளிச்சத்திற்கு வந்துள்ளது. அரசுப் பள்ளிகளில் சமீபத்தில் கட்டாயமாக்கப்பட்டுள்ள ஆன்லைன் ‘இ-வருகைப்பதிவு’ முறையில், குறித்த நேரத்திற்குள் பள்ளிக்குச் சென்று வருகையைப் பதிவு செய்ய வேண்டும் என்பதற்காகவே ஆசிரியர்கள் இந்த ஆபத்தான பயணத்தை மேற்கொள்கின்றனர். இது தொடர்பான வீடியோ இணையத்தில் வெளியாகி பலரது கவனத்தையும் ஈர்த்துள்ளது.

பாபேடி கிராம பஞ்சாயத்துக்கு உட்பட்ட நட்ரௌலி என்ற பகுதிக்குச் செல்லும் சாலை, தொடர் பருவமழை காரணமாக முழுமையாகத் துண்டிக்கப்பட்டுள்ளது. அப்பகுதியில் ஆற்றைக் கடக்க முறையான பாலமோ அல்லது மாற்றுப் பாதையோ இல்லாததால், ஆசிரியர்களும், மாணவர்களும், கிராம மக்களும் வேறு வழியின்றி ஆபத்தான நீரோட்டத்தை டயர் டியூப்களில் மிதந்தபடியே கடக்கின்றனர். உரிய நேரத்தில் பள்ளிக்குச் சென்று ஆன்லைனில் வருகையை உறுதி செய்யாவிட்டால் ‘ஆப்சென்ட்’ ஆகிவிடுவோம் என்ற அச்சமே ஆசிரியர்களை இந்த உயிரைப் பணயம் வைக்கும் செயலில் ஈடுபடத் தூண்டுகிறது.

இந்தச் சம்பவம், அரசின் டிஜிட்டல் திட்டங்களுக்கும், கிராமப்புறங்களில் நிலவும் மோசமான அடிப்படை கட்டமைப்பு வசதிகளுக்கும் இடையிலான மிகப்பெரிய இடைவெளியை அப்பட்டமாகக் காட்டுகிறது. ஒவ்வொரு ஆண்டும் மழைக்காலங்களில் சுமார் நான்கு மாதங்கள் இப்பகுதி துண்டிக்கப்படுவதாகவும், பாலம் கட்ட வேண்டும் என்ற தங்களின் நீண்டகால கோரிக்கை இன்னும் அரசால் நிறைவேற்றப்படவில்லை எனவும் கிராம மக்கள் குற்றம் சாட்டுகின்றனர். பாதுகாப்பான பயண வசதியோ, முறையான இணையத் தொடர்போ இல்லாத குக்கிராமங்களில், இதுபோன்று கடுமையான டிஜிட்டல் வருகைப்பதிவு முறைகளைச் செயல்படுத்துவது எந்த அளவுக்குச் சாத்தியம் என்ற கேள்வியும் தற்போது பரவலாக எழுந்துள்ளது.