“உண்மையானது என நம்புகிறேன்…” எக்ஸ் தளத்தில் வந்த பதிவை பார்த்து ஜி.வி.பிரகாஷ் செய்த காரியம்… பாராட்டும் நெட்டிசன்கள்…!!

தமிழ் சினிமாவில் முன்னணி இசையமைப்பாளராகவும் நடிகராகவும் வலம் வருபவர் ஜி.வி.பிரகாஷ்குமார். கடந்த 2006-ம் ஆண்டு ‘வெயில்’ திரைப்படத்தின் மூலம் அறிமுகமான இவர், ‘ஆயிரத்தில் ஒருவன்’, ‘அங்காடித் தெரு’, ‘பொல்லாதவன்’ உள்ளிட்ட பல படங்களுக்கு இசையமைத்து ரசிகர்களின் கவனம் ஈர்த்தார். தற்போது தமிழ், தெலுங்கு, கன்னடம், இந்தி எனப் பல மொழிகளில் இசையமைத்து வரும் இவர், 2015-ல் ‘டார்லிங்’ படத்தின் மூலம் நடிகராகவும் அறிமுகமாகி, சமீபத்தில் வெளியான ‘ஹேப்பி ராஜ்’ படம் வரை தொடர்ந்து பல படங்களில் நடித்துக் கொண்டிருக்கிறார்.

திரைத்துறை தாண்டி அரசியல் மற்றும் சமூக சேவை சார்ந்த விஷயங்களிலும் ஜி.வி.பிரகாஷ் தீவிரமாக ஈடுபட்டு வருகிறார். குறிப்பாக எக்ஸ் தளத்தில் அவரது கவனத்திற்கு வரும் உதவி கோரும் பதிவுகளுக்கு அவர் தொடர்ந்து நிதியுதவி அளித்து வருகிறார். சில நேரங்களில் அவை போலியான பதிவுகளாக இருந்தபோதிலும், அதையெல்லாம் கடந்து எக்ஸ் தளத்தில் உதவி கேட்பவர்களுக்கு ‘ஜிபே’ மூலமாகத் தொடர்ந்து பண உதவி செய்வதை அவர் வழக்கமாகக் கொண்டுள்ளார்.

அந்த வகையில், நெட்டிசன் ஒருவர் எக்ஸ் தளத்தில், பிஎஸ்ஜி மருத்துவமனையில் அனுமதிக்கப்பட்டுள்ள ஒருவருக்கு 12 மணி நேரத்திற்கும் மேலாக அறுவை சிகிச்சை நடந்து வருவதாகவும், தீவிர சிகிச்சைப் பிரிவு கட்டணத்திற்காக இன்னும் ஒரு லட்சம் ரூபாய் தேவைப்படுவதாகவும் பதிவிட்டிருந்தார். இதனைப் பார்த்த ஜி.வி.பிரகாஷ், உடனடியாக தனது தரப்பிலிருந்து ரூ. 50,000 பணத்தை ஜிபே மூலம் அனுப்பி வைத்துள்ளார். மேலும், அந்த ஸ்கிரீன் ஷாட்டைப் பகிர்ந்து, “என் தரப்பிலிருந்து ஒரு சிறு உதவி. இது உண்மையானது என்று நம்புகிறேன்” என்றும் நெகிழ்ச்சியுடன் பதிவிட்டுள்ளார்.