என்னது!,,, “நிஜ டைனோசர் தோலில் ஹேண்ட் பேக்கா?… இதன் விலையைக் கேட்டால் மயக்கமே வந்துவிடும்!… மிரள வைக்கும் புதிய டெக்னாலஜி”…!!

சுமார் 6.6 கோடி ஆண்டுகளுக்கு முன்பு வாழ்ந்த டி-ரெக்ஸ் (T-Rex) வகை டைனோசரின் படிமங்களிலிருந்து எடுக்கப்பட்ட கொலாஜன் புரதத்தைக் கொண்டு, உலகின் முதல் டைனோசர் தோல் ஹேண்ட் பேக் (Handbag) தயாரிக்கப்பட்டுள்ளது. ஆர்கனாய்டு (Organoid) எனும் ஜீனோமிக் இன்ஜினியரிங் நிறுவனம் மற்றும் வி.எம்.எல் (VML) கிரியேட்டிவ் ஏஜென்சி இணைந்து இந்த வினோதமான முயற்சியை மேற்கொண்டுள்ளன. டைனோசர் படிமங்களிலிருந்து பிரித்தெடுக்கப்பட்ட புரதத் துண்டுகளை மற்ற விலங்குகளின் செல்களில் செலுத்தி, நவீன தொழில்நுட்பம் மூலம் கொலாஜன் உற்பத்தி செய்யப்பட்டு, பின்னர் அது தோலாக மாற்றப்பட்டு இந்த பை தைக்கப்பட்டுள்ளது.

இந்தக் குழு ஏற்கனவே மாமூத் யானையின் டிஎன்ஏ-வை பயன்படுத்தி ராட்சத ‘மீட்பால்’ (Meatball) தயாரித்து உலக அளவில் செய்திகளில் இடம்பிடித்தது குறிப்பிடத்தக்கது. தற்போது உருவாக்கப்பட்டுள்ள இந்த டைனோசர் தோல் ஹேண்ட் பேக், நெதர்லாந்தின் ஆம்ஸ்டர்டாமில் உள்ள ‘ஆர்ட் ஜூ’ (Art Zoo) அருங்காட்சியகத்தில் மே 11-ஆம் தேதி வரை காட்சிக்கு வைக்கப்பட்டுள்ளது. ஒரு நிஜமான டி-ரெக்ஸ் எலும்புக்கூட்டிற்கு அடியில் காட்சிப்படுத்தப்பட்டுள்ள இந்தப் பை, அதன் பிறகு ஏலம் விடப்பட உள்ளது. இதன் ஆரம்ப விலை இந்திய மதிப்பில் சுமார் 4 கோடி ரூபாய்க்கும் அதிகமாக இருக்கும் என்று எதிர்பார்க்கப்படுகிறது.

இருப்பினும், இந்த ஹேண்ட் பேக்கின் உண்மைத்தன்மை குறித்து அறிவியல் அறிஞர்கள் மத்தியில் சில சந்தேகங்கள் எழுந்துள்ளன. பல கோடி ஆண்டுகள் பழமையான டைனோசர் எலும்புகளில் உள்ள கொலாஜன் புரதம் மிகவும் சிதைந்த நிலையில் மட்டுமே இருக்க வாய்ப்புள்ளதாகவும், அதை வைத்து ஒரு முழுமையான தோலை மறுசீரமைப்பு செய்வது அறிவியல் ரீதியாகச் சாத்தியமற்றது என்றும் சில ஆய்வாளர்கள் வாதிடுகின்றனர். இந்த விவாதம் ஒருபுறம் இருக்க, தொழில்நுட்பம் மற்றும் கலையின் சங்கமமாகப் பார்க்கப்படும் இந்த டைனோசர் ஹேண்ட் பேக் தற்போது உலக நாடுகளின் கவனத்தை ஈர்த்து வருகிறது.