“ஷாக்… கிராமவாசி மீது பாய்ந்து… குதறிய பெண் சிங்கம்… அலறியடித்து ஓடிய மக்கள்…நெஞ்சை பதறவைக்கும் காட்சி…!!”

குஜராத் மாநிலம் பாவ்நகர் மாவட்டத்தில் உள்ள கராசியா கிராமத்தில் பெண் சிங்கம் ஒன்று கிராமவாசி ஒருவரைத் தாக்கிய சம்பவம் பெரும் பரபரப்பை ஏற்படுத்தியுள்ளது. காலுபாய் கமாரா என்ற நபர் இந்தத் தாக்குதலில் காயமடைந்து மருத்துவமனையில் அனுமதிக்கப்பட்டுள்ளார். சிங்கம் அந்த மனிதரின் மீது பாய்ந்திருக்கும் இந்தத் தாக்குதல் குறித்த வீடியோ காட்சிகள் சமூக வலைத்தளங்களில் வைரலாகப் பரவி வரும் நிலையில், வனத்துறையினர் அந்தப் பெண் சிங்கத்தைத் தேடிப் பிடிக்கும் பணியில் தீவிரமாக ஈடுபட்டுள்ளனர்.

வனத்துறை வெளியிட்டுள்ள அறிக்கையின்படி, இந்தச் சிங்கம் தனது வழக்கமான நடமாட்டப் பாதையான கராசியா கிராமப் பகுதிக்குள் நுழைந்துள்ளது. அதிகாலை நேரத்தில் கிராம மக்கள் சிங்கத்தைக் கண்டு அச்சத்தில் கூச்சலிட்டதால், மிரட்சியடைந்து அங்கிருந்து தப்பியோட முயன்ற சிங்கம் எதிர்பாராதவிதமாக காலுபாயைத் தாக்கியுள்ளது. வனவிலங்குகளை யாரும் துன்புறுத்த வேண்டாம் என்றும், அவற்றைக் கண்டால் தாங்களாகவே விரட்ட முயலாமல் உடனடியாகத் தங்களுக்குத் தகவல் தெரிவிக்குமாறும் வன அதிகாரிகள் பொதுமக்களுக்கு வேண்டுகோள் விடுத்துள்ளனர்.

ஆசியச் சிங்கங்களின் ஒரே இயற்கை வாழிடமான குஜராத்தின் சௌராஷ்டிரா பிராந்தியத்தில், சமீபத்திய மாதங்களாக மனிதர்களுக்கும் சிங்கங்களுக்கும் இடையிலான மோதல்கள் அதிகரித்து வருகின்றன. சமீபத்தில் நடந்த இந்தத் தாக்குதலையும் சேர்த்து கடந்த சில மாதங்களில் ஐந்து சம்பவங்கள் பதிவாகியுள்ளன. 2025 ஆம் ஆண்டு கணக்கெடுப்பின்படி, குஜராத்தில் தற்போது 891 ஆசியச் சிங்கங்கள் உள்ளன என்பது குறிப்பிடத்தக்கது.