“சீனியர்களுக்கு ஷாக், ஜூனியர்களுக்கு ஜாக்பாட்… தமிழக காங்கிரஸில் அதிரடி மாற்றம்…!!!

தமிழக மாநிலங்களவைத் தேர்தல் களம் சூடுபிடித்துள்ள நிலையில், காங்கிரஸ் கட்சி தனது வேட்பாளராகப் புதுமுகமான கிறிஸ்டோபர் திலக்கை அறிவித்து அரசியல் வட்டாரத்தில் பெரும் பரபரப்பை ஏற்படுத்தியுள்ளது. திமுக கூட்டணியில் காங்கிரஸ் கட்சிக்கு ஒரு மாநிலங்களவை இடம் ஒதுக்கப்பட்ட நிலையில், இந்த வாய்ப்பு கட்சியின் மூத்த தலைவர்கள் எவருக்காவது கிடைக்கும் என்றே எதிர்பார்க்கப்பட்டது.

ஆனால், அனைவரையும் ஆச்சரியப்படுத்தும் வகையில் அகில இந்திய காங்கிரஸ் பொதுச்செயலாளராகவும், வடகிழக்கு மாநிலங்களின் பொறுப்பாளராகவும் இருக்கும் இளைஞரான கிறிஸ்டோபர் திலக்கை ராகுல் காந்தி தேர்வு செய்துள்ளார். இது பதவியைக் குறிவைத்து காய்நகர்த்திய தமிழக காங்கிரஸ் கட்சியின் மூத்த தலைவர்களுக்குப் பேரிடியாகவும், ஒருவித எச்சரிக்கையாகவும் அமைந்துள்ளது.

இந்த அதிரடி முடிவின் மூலம் தமிழக காங்கிரஸில் நிலவும் கோஷ்டி அரசியலுக்கு முற்றுப்புள்ளி வைத்து, அடிமட்டத்திலிருந்து உழைக்கும் இளைஞர்களுக்கு முக்கியத்துவம் அளிக்கப்படும் என்ற தெளிவான செய்தியை ராகுல் காந்தி தலைமையிலான தேசிய தலைமை விடுத்துள்ளது. கிறிஸ்டோபர் திலக் பட்டியலின சிறுபான்மை சமூகத்தைச் சேர்ந்தவர் என்பதால், சமூக நீதி மற்றும் இளைய தலைமுறை முன்னெடுப்பு ஆகிய இரு இலக்குகளையும் காங்கிரஸ் ஒரே நேரத்தில் எட்டியுள்ளது.

இந்நிலையில் கட்சியின் மூத்த தலைவர்கள் தங்களுக்குள் மோதிக் கொள்வதை விடுத்து, புதியவர்களுக்கு வழிவிட வேண்டும் என்ற தலைமைப்பண்பை நிலைநாட்டும் இந்த முடிவு, எதிர்வரும் சட்டமன்றத் தேர்தலிலும் இதுபோன்ற அதிரடி மாற்றங்கள் நிகழலாம் என்ற விவாதத்தை தமிழக அரசியலில் கிளப்பியுள்ளது.