1995 வேலூர் டூ 2026 தேனி…. தமிழக வரலாற்றை மாற்றியமைத்த 2 மிகப்பெரிய ஜெயில் பிரேக் சம்பவங்கள்…. நள்ளிரவில் நடந்த அந்த சதி….!

தமிழ்நாடு சிறைத்துறையின் வரலாற்றில் அவ்வப்போது சில தப்பியோட்டச் சம்பவங்கள் அரங்கேறியிருந்தாலும், ஒரே நேரத்தில் பல கைதிகள் திட்டமிட்டு தப்பிய நிகழ்வுகள் மாநிலத்தின் சட்டம்-ஒழுங்கையே உலுக்கியுள்ளன. 1995-ஆம் ஆண்டு வேலூர் கோட்டையில் சுரங்கப்பாதை தோண்டி நடந்த பெரும் தப்பியோட்டம் தொடங்கி, தற்போது 2026 அக்டோபரில் தேனி தெக்கம்பட்டி கிளைச் சிறையில் அரங்கேறியுள்ள 17 கைதிகளின் அதிரடித் தப்பியோட்டம் வரை, தமிழகத்தைக் கிடுகிடுக்க வைத்த இந்த இரண்டு முக்கிய சம்பவங்களும் சிறைப் பாதுகாப்பின் மீதான பெரும் கேள்விகளை எழுப்புகின்றன.

தேனி மாவட்டம் ஆண்டிபட்டி அருகே உள்ள தெக்கம்பட்டி கிளைச் சிறையில் கடந்த அக்டோபர் 26-ஆம் தேதி நள்ளிரவில் 17 விசாரணைக் கைதிகள் ஒன்று சேர்ந்து தப்பிச் சென்ற சம்பவம் பெரும் பரபரப்பை ஏற்படுத்தியுள்ளது. ஒரே அறையில் அடைக்கப்பட்டிருந்த கைதிகள் திடீரென வலிப்பு நாடகம் ஆடி, கதவைத் திறக்கச் சொல்லி காவலர் தங்கப்பாண்டியைத் தாக்கிவிட்டு பிரதான கதவு வழியாகத் தப்பியோடினர். இச்சம்பவத்தைத் தொடர்ந்து தென் மண்டல ஐஜி விஜயேந்திர பிதாரி மற்றும் தேனி எஸ்.பி தலைமையில் 17 தனிப்படைகள் அமைக்கப்பட்டு தீவிர தேடுதல் வேட்டை நடைபெற்று வருகிறது; இதுவரை 4 கைதிகள் மீண்டும் கைது செய்யப்பட்டுள்ள நிலையில், மீதமுள்ளவர்களைத் தேடும் பணி முடுக்கிவிடப்பட்டுள்ளது.

இதற்கு முந்தைய மிகப்பெரிய கூட்டுச் சிறைத் தப்பியோட்டம் என்றால், அது 1995-ஆம் ஆண்டு சுதந்திர தினத்தன்று வேலூர் கோட்டை சிறப்பு முகாமில் நடந்த வரலாற்றுச் சம்பவம்தான். 460 ஆண்டுகள் பழமையான வேலூர் கோட்டைக்குள் அமைந்திருந்த திப்பு மஹால் சிறப்பு முகாமில் தமிழீழ விடுதலைப் புலிகள் இயக்கத்தைச் சேர்ந்த கைதிகள் அடைக்கப்பட்டிருந்தனர். இவர்கள் பல மாதங்களாக மிக ரகசியமாகத் திட்டமிட்டு, தரைக்குக் கீழே 153 அடி நீளத்திற்குச் சுரங்கப்பாதை தோண்டி, கோட்டையின் வெளிப்பகுதிக்குச் செல்லும் வழியைத் துல்லியமாக உருவாக்கினர்.

1995 ஆகஸ்ட் 15 நள்ளிரவில் அந்தச் சுரங்கப்பாதை வழியாக வெளியேறிய 43 கைதிகளும், கோட்டையைச் சுற்றியிருந்த 50 அடி அகல அகழியை நீந்திக் கடந்து தப்பினர். நாடே சுதந்திர தின விழாவைக் கொண்டாடிய வேளையில், சென்னையில் பிடிபட்ட ஒரு கைதி சயனைடு குப்பியை விழுங்கி உயிரிழந்த பின்னர்தான் இந்தத் தப்பியோட்டத்தின் ரகசியம் வெளிச்சத்துக்கு வந்தது. உடனடியாக முடுக்கிவிடப்பட்ட போலீஸ் வேட்டையில் அடுத்த சில வாரங்களிலேயே 21 பேர் மீண்டும் கைது செய்யப்பட்டனர்.

வேலூர் கோட்டை சம்பவத்தில் கைதிகள் நீண்டகாலம் எடுத்துக்கொண்டு பொறியியல் தொழில்நுட்பம் போல சுரங்கப்பாதை அமைத்துத் தப்பினர் என்றால், தேனி சம்பவத்தில் உடனடி நாடகம் ஒன்றைப் போட்டு காவலரின் கவனக்குறைவைப் பயன்படுத்தித் தப்பியுள்ளனர். ஆண்டுகள் பல கடந்தாலும், சிறைத்துறையின் கண்காணிப்பு நடைமுறைகளில் ஏற்படும் சிறிய இடைவெளிகளைத் கைதிகள் தங்களுக்குச் சாதகமாகப் பயன்படுத்திக் கொள்கிறார்கள் என்பதை இந்த இரண்டு வரலாற்றுச் சம்பவங்களும் மீண்டும் ஒருமுறை உணர்த்துகின்றன.