ஆடி அமாவாசையில் திருச்செந்தூரில் நடந்த பயங்கரம்…. 14 வயது சிறுவன் அலறல்… 10 நிமிடம் மரண போராட்டம்…. பதறவைக்கும் காட்சி…!

திருச்செந்தூர் சுப்பிரமணியசாமி திருக்கோவில் கடற்கரையில் ஆடி அமாவாசையை முன்னிட்டு கடலில் சீற்றம் அதிகமாகக் காணப்படுகிறது. இந்நாட்களில் காலை வேளையில் கடல் உள்வாங்குவதும், பகலில் பலத்த காற்றுடன் ராட்சத அலைகள் எழும்புவதுமாக நிலவுகிறது. இதனால் பக்தர்களின் பாதுகாப்பு கருதி திருக்கோவில் கடற்கரை பாதுகாப்புப் பணியாளர்கள் தீவிர கண்காணிப்பில் ஈடுபட்டு, எச்சரிக்கையுடன் நீராடுமாறு தொடர்ந்து அறிவுறுத்தி வருகின்றனர்.

இந்நிலையில், சாத்தூரைச் சேர்ந்த ராஜா என்பவரின் 14 வயது மகன் சரண், தனது நண்பர்களுடன் கடலில் நீராடிக் கொண்டிருந்தபோது திடீரென வந்த ராட்சத அலையில் சிக்கி ஆழமான பகுதிக்கு இழுத்துச் செல்லப்பட்டார். உயிருக்குப் போராடிய சிறுவனைக் கண்ட திருக்கோவில் கடற்கரை பாதுகாப்புப் பணியாளர் சிவராஜா, உடனடியாகக் கடலில் இறங்கிச் செயல்பட்டார். சுமார் பத்து நிமிட போராட்டத்திற்குப் பிறகு, சிறுவனைத் தனது தோளில் தாங்கிப் பத்திரமாகக் கரைக்குக் கொண்டு வந்தார்.

இந்தச் மீட்புப் போராட்டத்தின் போது பாதுகாப்புப் பணியாளர் சிவராஜா மற்றும் சிறுவன் சரண் ஆகிய இருவருக்கும் லேசான காயங்கள் ஏற்பட்டன. எனினும், தனது உயிரையும் பொருட்படுத்தாமல் ஆழமான பகுதிக்குச் சென்று சிறுவனைப் பாதுகாப்பாக மீட்டு வந்த சிவராஜாவின் வீரத்தையும், மீட்புக் குழுவினரின் உடனடிச் செயல்பாட்டையும் கரையில் திரண்டிருந்த பக்தர்கள் வெகுவாகப் பாராட்டி வாழ்த்துகளைத் தெரிவித்தனர்.

பொதுவாக அமாவாசை மற்றும் பவுர்ணமி நாட்களில் கடல் சீற்றத்துடன் காணப்படும் என்பதால், பொதுமக்கள் மற்றும் பக்தர்கள் கடலில் நீராடும் போது கூடுதல் கவனத்துடன் இருக்க வேண்டும். திருச்செந்தூர் மற்றும் சென்னை மெரினா போன்ற கடற்கரைகளில் அண்மையில் நடந்த இத்தகைய சம்பவங்கள், பாதுகாப்புப் பணியாளர்களின் எச்சரிக்கைகளை மதித்து நடப்பதன் அவசியத்தை நமக்கு உணர்த்துகின்றன.