“இபிஎஸ்ஸுக்கு 13… சி.வி.சண்முகத்துக்கு 37!”.. அதிமுகவில் வெடித்த திடீர் கலகம்.. எடப்பாடி கோட்டை சரிகிறதா?… பின்னணியில் நடக்கும் ‘பிக்பாஸ்’ அரசியல்..!!!

தமிழக சட்டமன்றத் தேர்தல் முடிவுகள் கடந்த 4-ம் தேதி வெளியான நிலையில், அ.தி.மு.க 47 இடங்களை மட்டுமே வென்று 3-வது இடத்திற்குத் தள்ளப்பட்டது பெரும் அதிர்ச்சியை ஏற்படுத்தியுள்ளது. எதிர்க்கட்சி அந்தஸ்தை இழந்ததுடன், 82 மாவட்டச் செயலாளர்களைக் கொண்ட இந்தக் கட்சியில் தற்போது தலைமைக்கு எதிராகக் குழப்பங்கள் முளைத்துள்ளன. இந்தத் தோல்வியைத் தொடர்ந்து, எடப்பாடி பழனிசாமி மற்றும் சி.வி.சண்முகம் ஆகிய இருவருக்கும் இடையே கடுமையான கருத்து வேறுபாடு ஏற்பட்டுள்ளதாகக் கூறப்படுகிறது. குறிப்பாக, அ.தி.மு.க எம்.எல்.ஏக்கள் புதுச்சேரி விடுதியில் தங்க வைக்கப்பட்டது மற்றும் சி.வி.சண்முகம் தனியாக ஆலோசனை நடத்தியது கட்சியில் பிளவு ஏற்படுகிறதா என்ற சந்தேகத்தை வலுப்படுத்தியுள்ளது.

கடந்த இரண்டு நாட்களாக சென்னையில் இருவேறான ஆலோசனைக் கூட்டங்கள் நடைபெற்றது அ.தி.மு.க தொண்டர்களிடையே குழப்பத்தை ஏற்படுத்தியுள்ளது. எம்.ஆர்.சி நகரில் உள்ள சி.வி.சண்முகம் இல்லத்தில் நடைபெற்ற கூட்டத்தில் எஸ்.பி.வேலுமணி, சி.விஜயபாஸ்கர், கே.பி.அன்பழகன் உள்ளிட்ட 37 எம்.எல்.ஏக்கள் மற்றும் முக்கிய நிர்வாகிகள் பங்கேற்றனர். அதே நேரத்தில், பசுமை வழிச்சாலையில் உள்ள எடப்பாடி பழனிசாமி இல்லத்தில் நடைபெற்ற கூட்டத்தில் திண்டுக்கல் சீனிவாசன், கே.பி.முனுசாமி மற்றும் 13 எம்.எல்.ஏக்கள் மட்டுமே பங்கேற்றதாகத் தெரிகிறது. பெரும்பான்மையான எம்.எல்.ஏக்கள் சி.வி.சண்முகம் பக்கம் சாய்ந்திருப்பது இ.பி.எஸ் தலைமைக்குப் பெரும் சவாலாக மாறியுள்ளது.

இந்த உட்கட்சி மோதல் குறித்து சி.வி.சண்முகத்திடம் செய்தியாளர்கள் கேட்டபோது, “பொறுத்திருந்து பாருங்கள்” என்று மர்மமாகப் பதிலளித்துள்ளார். இது கட்சியின் அடுத்தகட்ட நகர்வு என்னவாக இருக்கும் என்ற விவாதத்தைத் தூண்டியுள்ளது. மறுபுறம், எடப்பாடி பழனிசாமிக்கு ஆதரவாகச் சிலர் குரல் கொடுத்து வருகின்றனர். முன்னாள் எம்.எல்.ஏ மணிமேகலை போன்றோர், “தனது தொகுதியில் சுமார் ஒரு லட்சம் வாக்குகள் வித்தியாசத்தில் வெற்றி பெற்ற இ.பி.எஸ் பதவி விலக வேண்டிய அவசியமில்லை” என்றும், கட்சியின் தோல்விக்கான காரணங்களை ஆராய்ந்து அவர் மீண்டும் எழுச்சி பெறச் செய்வார் என்றும் நம்பிக்கை தெரிவித்துள்ளனர்.

கட்சியில் இருந்து பிரிந்து சென்றவர்களை மீண்டும் இணைப்பது அல்லது தலைமை மாற்றங்கள் குறித்துப் பொதுச்செயலாளர் எடுக்கும் முடிவுக்குத் தொண்டர்கள் கட்டுப்படுவார்கள் என ஒரு தரப்பு கூறினாலும், சட்டமன்ற உறுப்பினர்கள் இரு அணிகளாகப் பிரிந்து நிற்பது அ.தி.மு.க-வில் மிகப்பெரிய அரசியல் மாற்றத்திற்கான அறிகுறியாகவே பார்க்கப்படுகிறது. புதிய அரசு பொறுப்பேற்றுள்ள நிலையில், பிரதான எதிர்க்கட்சி அந்தஸ்தை இழந்த அ.தி.மு.க தனது உட்கட்சிப் பூசல்களைத் தீர்த்து மீண்டும் ஒருங்கிணையுமா அல்லது புதிய தலைமையின் கீழ் இயங்குமா என்பது வரும் நாட்களில் தெரியவரும்.