விஸ்வாசத்தை சந்தேகப்பட்ட பாரதிராஜா… சபதமெடுத்து அதை வென்று காட்டிய பாக்கியராஜ்!

தமிழ் சினிமாவின் போக்கையே மாற்றிய இயக்குனர்களில் ஒருவர் பாரதிராஜா. அவர் இயக்கிய ஆரம்பகால திரைப்படங்களான 16 வயதினிலே, கிழக்கே போகும் ரயில் மற்றும் சிவப்பு ரோஜாக்கள் போன்றவை தமிழ் சினிமா ரசிகனை பிரம்மிக்க வைத்தன. அதுவரை அவர்கள் பார்த்து வந்து நாடக  மேடைத்தனமான சினிமாக்களில் இருந்து அவர்களை வேறொரு தளத்துக்கு அழைத்துச் சென்றன அந்த திரைப்படங்கள்.

அவரின் இந்த ஆரம்பகால படங்களில் எல்லாம் அவரது கூடவே இருந்த உதவி இயக்குனரான பாக்கியராஜுக்கும் ஒரு குறிப்பிடத்தகுந்த பங்குண்டு. பாரதிராஜாவின் படங்களின் வசனங்கள் மூலமாக மெருகேற்றியவர் பாக்கியராஜ். இவரின் திறமையைக் கணித்த தயாரிப்பாளர்கள் அவர் இயக்கத்தில் படம் தயாரிக்க ஆர்வமாக இருந்தனர்.

அதில் ஒருவர்தான் பதினாறு வயதினிலே மற்றும் கிழக்கே போகும் ரயில் ஆகிய படங்களை தயாரித்த எஸ் ஏ ராஜ்கண்ணு. அப்போது சிவப்பு ரோஜாக்கள் திரைப்படம் இறுதிகட்டத்தை நெருங்கிக் கொண்டிருந்தது. இதை முடித்துவிட்டு தன்னுடைய அடுத்த படத்தை ஆரம்பிக்கலாம் என நினைத்திருந்தார் பாக்யராஜ்.

அந்த நேரத்தில் பாரதிராஜாவுக்கும் எஸ் ஏ ராஜ்கண்ணுவுக்கும் இடையில் கிழக்கே போகும் ரயில் திரைப்படத்தின் ரீமேக் உரிமையில் பாரதிராஜாவுக்கு பங்கு தருவதில் சிக்கல் எழுந்துள்ளது. அப்போது பாக்யராஜ் தயாரிப்பாளர் பக்கம் சேர்ந்துகொண்டு செயல்படுவதாக பாரதிராஜா சந்தேகப்பட்டுள்ளார். அதனால் அவரை அழைத்துக் கடுமையாக திட்டியுள்ளார். “நீ உன் முதல் படத்தை ராஜ்கண்ணு தயாரிக்க வேண்டுமென்று எனக்கு துரோகம் செய்கிறாய்” எனக் கூறியுள்ளார்.

இதைக்கேட்டு அதிர்ச்சியடைந்த பாக்யராஜ் “என் முதல் படத்தை ராஜ்கண்ணு தயாரிக்க மாட்டார்” என சபதம் செய்துவிட்டு போயிருக்கிறார். சொன்னது போலவே அவரின் முதல் படத்தை ராஜ்கண்ணு தயாரிக்க வில்லை. அதன் பின்னர் பல படங்கள் இயக்கிய போதும்கூட ராஜ்கண்ணுவோடு அவர் இணையவில்லை.

ஒருநாள் பாரதிராஜாவே அழைத்து “இப்போது ராஜ்கண்ணு நஷ்டத்தில் இருக்கிறார். அவருக்கு ஒரு படம் பண்ணி கொடு” என சொன்னபிறகுதான் அவரோடு இணைந்து ’எங்க சின்ன ராசா’ படத்தை அவருக்கு இயக்கிக் கொடுத்துள்ளார் பாக்யராஜ்.