நாமக்கல் மாவட்டத்தைச் சேர்ந்த பெண் காவலர் தேன்மொழி, தற்போது பொதட்டூர்பேட்டை காவல் நிலையத்தில் பணியாற்றி வருகிறார். இவர் முன்பு பள்ளிப்பட்டில் வேலை செய்தபோது, அங்கு கணினி இயக்குநராகப் பணிபுரியும் திருத்தணியைச் சேர்ந்த ராம்குமார் என்பவர் அவரை ஒருதலைப்பட்சமாக காதலித்து வந்துள்ளார். தேன்மொழி தனது எதிர்ப்பை திட்டவட்டமாகத் தெரிவித்தும், ராம்குமார் அதனைப் பொருட்படுத்தாமல் அலைபேசி வாயிலாகவும் மற்ற வழிகளிலும் தொடர்ந்து அவருக்குத் தொல்லை கொடுத்து வந்துள்ளார்.
இந்நிலையில், சமீபத்தில் மாவட்ட காவல் கண்காணிப்பாளர் அலுவலக கூட்டத்திற்குச் செல்வதற்காக தேன்மொழி தனது இருசக்கர வாகனத்தில் தனியாகச் சென்று கொண்டிருந்தார். அப்போது அவரைப் பின்தொடர்ந்து காரில் வந்த ராம்குமார், ஆள் அரவமற்ற ஒரு பகுதியில் அவரை வழிமறித்துத் தனது காதலை ஏற்குமாறு மீண்டும் கட்டாயப்படுத்தியுள்ளார். அங்கிருந்து தப்பிய தேன்மொழி, மாவட்ட எஸ்.பி. சாய் பிரணீத்திடம் நேரில் அளித்த புகாரின் அடிப்படையில் காவல்துறையினர் ராம்குமாரைக் கைது செய்தனர். காவல் துறையில் பணிபுரிந்து உயிரிழந்த தனது தந்தையின் மூலம் கருணை அடிப்படையில் அரசு வேலையைப் பெற்ற ஒருவரே, பெண் காவலருக்குத் தொல்லை கொடுத்துக் கைதாகியுள்ள சம்பவம் சக காவல்துறையினர் மத்தியில் பெரும் அதிர்ச்சியை ஏற்படுத்தியுள்ளது.