நேபாளத்தின் நாராயணி ஆற்றில் ஏற்பட்ட பெருவெள்ளத்தில் அடித்து வரப்பட்ட ஒரு பெண்ணின் சடலத்திலிருந்து இருவர் தங்க நகைகளைத் திருடிய சம்பவம் பெரும் அதிர்ச்சியை ஏற்படுத்தியுள்ளது. மரக்கட்டைகள் மூலம் அந்த உடலை கரைக்குக் கொண்டுவந்த நபர்கள், இரக்கமின்றி காதணிகளைத் திருடும் காட்சிகள் அங்கிருந்தவர்களால் செல்போனில் பதிவு செய்யப்பட்டு இணையத்தில் வைரலானது. இந்த வீடியோ ஆதாரத்தின் அடிப்படையில் துரிதமாகச் செயல்பட்ட சித்வான் மாவட்ட காவல்துறையினர், இக்குற்றத்தில் ஈடுபட்ட மதன் குரூங் மற்றும் உமேஷ் சௌத்ரி ஆகிய இருவரையும் ஆகஸ்ட் 27 அன்று பரத்பூர் பகுதியில் வைத்து கைது செய்து தீவிரமாக விசாரித்து வருகின்றனர்.
தற்போதைய பேரிடர் காலச் சூழலில், நேபாளம் மற்றும் திபெத் பகுதிகளில் பெருக்கெடுத்துள்ள வெள்ளத்தில் சிக்கி நூற்றுக்கணக்கான மக்கள் பரிதாபமாக உயிரிழந்துள்ளனர்; மேலும் பலரைக் காணவில்லை. இத்தகைய துயரமான சூழ்நிலையில், மனிதாபிமானமற்ற முறையில் உயிரிழந்தவர்களின் சடலங்களிலிருந்தோ அல்லது அவர்களின் உடமைகளையோ திருடும் ஈனச்செயலில் ஈடுபடுவோர் மீது மிகவும் கடுமையான சட்ட நடவடிக்கை பாயும் என நேபாள காவல் துறை சார்பில் கடும் எச்சரிக்கை விடுக்கப்பட்டுள்ளது.|