ஒரே அரசாணையில் 100 டெண்டர்களை தூக்கிய CM விஜய்… தவெக அரசின் ‘ஆபரேஷன் டெண்டர்’ ரகசியம்…. ஆடிப்போன அரசு அதிகாரிகள்…!

தமிழக வெற்றி கழகத்தின் (தவெக) தலைவர் விஜய் தலைமையிலான புதிய அரசு, நிர்வாகத் திறமையிலும் ஊழல் தடுப்பு நடவடிக்கைகளிலும் சமரசம் இல்லை என்பதை உணர்த்தும் வகையில் ஒரு முக்கிய அதிரடி சீர்திருத்த நடவடிக்கையை எடுத்துள்ளது. அண்மையில் ரிக்கி ராதன் பண்டிட் நியமன சர்ச்சை ஓய்வதற்குள், ஊரக வளர்ச்சித்துறை அமைச்சர் புஸ்ஸி ஆனந்தின் துறையில் நடந்த ஒப்பந்த முறைகேடு பெரும் விமர்சனத்திற்கு உள்ளானது. இதனைத் தொடர்ந்து, மக்கள் மத்தியில் அரசின் மீதான நம்பகத்தன்மையை நிலைநாட்டும் விதமாக, பல்வேறு அரசுத் துறைகளில் வெளியிடப்பட்ட 100-க்கும் மேற்பட்ட குறுகிய கால டெண்டர்களை முதல்வர் விஜய் தலைமையிலான அரசு அதிரடியாக ரத்து செய்து உத்தரவிட்டுள்ளது.

பொதுவாக அவசரத் தேவைகளுக்காகவும் சிறிய பணிகளுக்காகவும் விரைவாக வெளியிடப்படும் இந்த குறுகிய கால டெண்டர்கள், சில நேரங்களில் முறைகேடுகளுக்கு சாதகமாகப் பயன்படுத்தப்படுவதாக குற்றச்சாட்டுகள் எழுவதுண்டு. அந்த வகையில், மே 13-ம் தேதி முதல் மே 22-ம் தேதி வரையிலான காலகட்டத்தில் ஊரக வளர்ச்சித் துறை, பஞ்சாயத்து ராஜ், போக்குவரத்து, பொதுப்பணித்துறை, மின்சாரத் துறை, சென்னை மாநகராட்சி மற்றும் நகராட்சி நிர்வாகம் உள்ளிட்ட முக்கிய துறைகளில் வெளியிடப்பட்ட அனைத்து குறுகிய கால டெண்டர்களும் தற்போது நிர்வாக காரணங்களை முன்னிறுத்தி ரத்து செய்யப்பட்டுள்ளன. தவெக ஆட்சிப் பொறுப்பேற்றது முதல் அரசு ஒப்பந்தங்கள் அனைத்தும் தீவிர ஆய்வுக்கு உட்படுத்தப்பட்டு வரும் நிலையில், விதிமீறல்கள் கண்டறியப்பட்டதால் இந்த நடவடிக்கை பாய்ந்துள்ளது.

இந்த அதிரடி உத்தரவு அரசு அதிகாரிகள் வட்டாரத்தில் பெரும் பரபரப்பை ஏற்படுத்தியுள்ளது. சர்ச்சைக்குரிய இந்த டெண்டர்கள் யாருக்கு வழங்கப்பட்டன, இதற்குப் பின்னால் பின்னணியில் செயல்பட்ட அதிகாரிகள் யார் என்பது குறித்த முழுமையான பட்டியலைத் தயாரிக்கும் பணியில் அரசு தற்பொழுது தீவிரமாக இறங்கியுள்ளது. முறைகேடுகளில் தொடர்புடைய அரசு அதிகாரிகள் மீது துறை ரீதியான விசாரணை தொடங்கப்பட்டுள்ளதோடு, ஏற்கனவே சிலர் சஸ்பெண்ட் செய்யப்பட்டுள்ள நிலையில் மேலும் பல அதிகாரிகள் இந்த விவகாரத்தில் சிக்கக்கூடும் என்ற அச்சமும், அரசுக்கு இழப்பு ஏற்படுத்தியவர்கள் மீதான சட்டரீதியான விசாரணையும் முடுக்கிவிடப்பட்டுள்ளது.

சமீபத்தில் காஞ்சிபுரம் மாவட்டம் காரைப்பேட்டையில் ரூ.16.83 லட்சம் மதிப்பிலான மேல்நிலை நீர்த்தேக்கத் தொட்டி கட்டுமானப் பணிக்கான டெண்டர், வெறும் 6 மணி நேரத்திற்குள் (காலை 9 மணிக்குத் தொடங்கி மாலை 3 மணிக்குள்) அவசர அவசரமாக முடிக்கப்பட்டு பணி ஆணை வழங்கப்பட்ட விவகாரம் பெரும் புயலைக் கிளப்பியது. குறைந்தபட்சம் 15 நாட்கள் அவகாசம் அளிக்கப்பட வேண்டும் என்ற விதியை மீறி, 24 மணி நேரத்திற்கும் குறைவான அவகாசத்தில் இ-டெண்டர் முடிக்கப்பட்டதால், எதிர்க்கட்சிகளும் சமூக ஆர்வலர்களும் இதை கடுமையாக விமர்சித்தனர். இதையடுத்து, மக்களின் வரிப்பணம் முறைகேடின்றி சரியான முறையில் பயன்படுத்தப்பட வேண்டும் என்ற நோக்கில், தகுந்த அனுமதியின்றி செயல்பட்ட இரு அரசு அதிகாரிகளை சஸ்பெண்ட் செய்ததோடு, தற்போது ஒட்டுமொத்தமாக 100 டெண்டர்களை ரத்து செய்து விஜய் அரசு தன் சீர்திருத்தப் பாதையைத் தெளிவுபடுத்தியுள்ளது.