தமிழகத்தில் ஆட்சிப் பொறுப்பேற்ற இரண்டே மாதங்களில், தமிழக வெற்றிக் கழகத்தின் தலைவர் மற்றும் முதலமைச்சர் ஜோசப் விஜய் தலைமையிலான அரசு, அரசியல் வட்டாரத்தில் பெரும் விவாதங்களை கிளப்பியுள்ளது. தவெக அரசை மற்றும் முதல்வர் விஜயை சமூக ஊடகங்களிலும், பொதுக்கூட்டங்களிலும் விமர்சிப்பவர்கள் மீது காவல்துறை எடுத்து வரும் அதிரடி கைது நடவடிக்கைகள் இதற்கு முக்கியக் காரணமாகும். குறிப்பாக, எதிர்க்கட்சியினரை நள்ளிரவிலும், தேடித்தேடியும் கைது செய்யும் தற்போதைய போக்கு, 90-களில் மறைந்த முன்னாள் முதல்வர் ஜெயலலிதா முன்னெடுத்த அசுர வேக அரசியல் பழிவாங்கல் மற்றும் நள்ளிரவு கைது நடவடிக்கைகளை பொதுமக்களுக்கு நினைவுபடுத்துவதாக அரசியல் விமர்சகர்கள் குற்றம் சாட்டுகின்றனர்.
இதற்கு மிக முக்கிய உதாரணமாக, முதல்வர் விஜய் குறித்து அவதூறாகப் பேசினார் என்ற புகாரில் திமுக எம்.எல்.ஏ-வும், முன்னாள் அமைச்சருமான அனிதா ராதாகிருஷ்ணன் அதிரடியாகக் கைது செய்யப்பட்ட சம்பவத்தைக் குறிப்பிடலாம். சென்னை உயர் நீதிமன்றம் அவரது முன்ஜாமீன் மனுவை தள்ளுபடி செய்த சில மணி நேரங்களிலேயே ஆத்தூர் போலீசார் இந்த நடவடிக்கையை மேற்கொண்டனர். தீவிர விசாரணை மற்றும் மருத்துவப் பரிசோதனைக்குப் பிறகு நள்ளிரவில் நீதிமன்றத்தில் ஆஜர்படுத்தப்பட்ட அவருக்கு நீதிபதி நிபந்தனை ஜாமீன் வழங்கியதால் சிறையிலடைக்கும் திட்டம் தவிடுபொடியானது. மேலும், காவலில் இருந்தபோது தன்னை தவெகவில் இணையுமாறு போலீசார் வற்புறுத்தியதாக அனிதா ராதாகிருஷ்ணன் கூறியுள்ள குற்றச்சாட்டு தமிழக அரசியலில் புயலைக் கிளப்பியுள்ளது.
அரசியல் தலைவர்கள் மட்டுமன்றி, சமூக ஊடகங்களில் அரசை விமர்சிக்கும் இளம் தலைமுறையினர் மீதும் இந்த ஒடுக்குமுறை பாய்ந்துள்ளது. முதல்வர் விஜய் மற்றும் அவரது குடும்பத்தினரைத் தாக்கி இன்ஸ்டாகிராமில் வீடியோ வெளியிட்டதாக, கிருஷ்ணகிரியைச் சேர்ந்த திமுக Gen Z பிரிவு ஒருங்கிணைப்பாளர் ஏ. அன்பானந்தம் மீது நள்ளிரவில் நடத்தப்பட்ட சோதனையும் கைது முயற்சிகளும் பெரும் பரபரப்பை ஏற்படுத்தின. பொதுவாக அவதூறு வழக்குகளில் கைது நடவடிக்கைகள் மேற்கொள்ளப்படாத நிலையில், தவெக அரசு விமர்சனங்களுக்கு எதிராக கடுமையான சட்ட நடவடிக்கைகளை முடுக்கிவிட்டுள்ளது திமுகவினரிடையே கொந்தளிப்பை ஏற்படுத்தியுள்ளது.
இந்த அடுத்தடுத்த அதிரடி நடவடிக்கைகளைக் கண்டித்துள்ள திமுக தலைவர் மு.க. ஸ்டாலின், “முதல்வர் விஜய் தமிழ்நாட்டில் ஒரு சினிமா பாணி போலீஸ் ராஜ்ஜியத்தை நடத்தி வருகிறார்” என்று சாடியுள்ளார். அதேபோல், எதிர்க்கட்சித் தலைவர் உதயநிதி ஸ்டாலினும் “இது ஒரு ரீல்ஸ் அரசாங்கம், விமர்சனங்களைத் தாங்க முடியாமல் நடுங்குகிறது” என்று கடுமையாக விமர்சித்துள்ளார். ஜெயலலிதாவின் ஆட்சிக்கால நள்ளிரவு கைது பாணியை முதல்வர் விஜய் கையில் எடுத்துள்ளதாக விமர்சனங்கள் எழுந்தாலும், பழிவாங்கும் நோக்கில் பாயும் போலீசாரின் வழக்குகளை நீதிமன்றங்கள் அடுத்தடுத்து நிராகரிப்பதும், ஜாமீன் வழங்குவதும் தவெக அரசுக்கு ஆரம்பக்கட்டத்திலேயே ஒரு பெரும் அரசியல் பின்னடைவாகவே கருதப்படுகிறது.