கடந்த பிப்ரவரி மாதம் வளைகுடா பகுதியில் தொடங்கிய போர் காரணமாக, உலக நாடுகள் அனைத்தும் பெரும் பதற்றத்தில் ஆழ்ந்துள்ளன. குறிப்பாக, உலக எரிசக்தி போக்குவரத்தின் முக்கிய பாதையான ஹார்முஸ் ஜலசந்தி முடங்கியதால் கச்சா எண்ணெய் விலை உயர்ந்து, உலகப் பொருளாதாரம் பாதிக்கப்பட்டது. தற்போது நேரடித் தாக்குதல்கள் சற்று குறைந்திருந்தாலும், போர் இன்னும் முழுமையாக முடிவுக்கு வரவில்லை. இந்தச் சூழலில், ஈரானுடனான அமைதி ஒப்பந்தம் (US-Iran Peace Deal) கிட்டத்தட்ட எட்டப்பட்டுவிட்டதாக அமெரிக்க அதிபர் டொனால்ட் டிரம்ப் தனது ‘டிரூத் சோஷியல்’ பக்கத்தில் அதிரடியாக அறிவித்துள்ளது சர்வதேச அளவில் பெரும் விவாதத்தைக் கிளப்பியுள்ளது.
அதிபர் டிரம்ப் தனது பதிவில், அமெரிக்கா, ஈரான் மற்றும் இதர நாடுகளுக்கு இடையேயான அமைதி ஒப்பந்தம் இறுதி நிலையை எட்டிவிட்டதாகவும், சில முக்கிய விவரங்கள் மட்டுமே ஆலோசிக்கப்பட்டு வருவதாகவும் குறிப்பிட்டுள்ளார். மேலும், இது குறித்து இஸ்ரேல் பிரதமர் நெதன்யாகுவுடன் நடத்திய தொலைப்பேசி உரையாடல் மிகச் சிறப்பாக அமைந்தது என்றும், விரைவில் நல்ல செய்தி வெளியாகும் என்றும் அவர் நம்பிக்கை தெரிவித்துள்ளார். இந்த ஒப்பந்தம் மூலம் ஹார்முஸ் ஜலசந்தி மீண்டும் முழுமையாகத் திறக்கப்பட்டு, சர்வதேசக் கப்பல் போக்குவரத்து வழக்கம் போல் சீராகும் என்பது டிரம்ப் தரப்பின் முக்கிய வாதமாக உள்ளது.
மறுபுறம், ஈரானின் வெளியுறவு அமைச்சக செய்தித் தொடர்பாளர் இஸ்மாயில் பகாஹி, தம்மீது திணிக்கப்பட்ட போரை முடிவுக்குக் கொண்டு வர 14 முக்கிய அம்சங்கள் கொண்ட ஒப்பந்தத்திற்கு முதற்கட்டமாகச் சம்மதித்துள்ளதை உறுதிப்படுத்தியுள்ளார். லெபனான் உட்பட அனைத்து முனைகளிலும் போர் நிறுத்தம், ஈரான் துறைமுகங்கள் மீதான அமெரிக்காவின் கடற்படை முற்றுகையை நீக்குதல் மற்றும் அமெரிக்காவால் முடக்கப்பட்டுள்ள ஈரானின் பில்லியன் கணக்கான டாலர் சொத்துக்களை விடுவித்தல் ஆகிய கோரிக்கைகளை முன்வைத்தே இந்தப் பேச்சுவார்த்தை நடப்பதாக ஈரான் தெரிவித்துள்ளது. ஆனால், ஹார்முஸ் ஜலசந்தியின் முழுக் கட்டுப்பாடு எப்போதும் போல ஈரானிடமே இருக்கும் என்றும், சர்வதேசக் கப்பல்களுக்குத் தடையற்ற அனுமதி வழங்கிவிட்டதாக டிரம்ப் கூறுவது முற்றிலும் தவறு என்றும் ஈரான் மறுத்துள்ளது.
இந்த அமைதி ஒப்பந்த முயற்சியில் மற்றொரு பெரிய குழப்பமாக ஈரானின் அணு ஆயுத விவகாரம் பார்க்கப்படுகிறது. கடந்த காலங்களில் ஈரானுடன் எந்த ஒப்பந்தம் என்றாலும் அதன் அணுசக்தித் திட்டத்தை முடக்குவதே முதல் நிபந்தனை என்று டிரம்ப் கூறி வந்த நிலையில், தற்போதைய ஒப்பந்தத்தில் அது குறித்து ஒரு வார்த்தை கூடப் பேசப்படவில்லை என்று ஈரானின் புரட்சிகரப் பாதுகாப்புப் படை சுட்டிக்காட்டியுள்ளது. ஈரான் அணுசக்தி குறித்து எந்த வாக்குறுதியும் அளிக்காததால், டிரம்பின் இந்த அறிவிப்பு வெறும் “அரசியல் விளம்பரம்” மட்டுமே என்று அவர்கள் விமர்சித்துள்ளனர். இவ்வாறு இரு தரப்பும் முரண்பட்ட கருத்துக்களை வெளியிட்டு வருவதால், வளைகுடா போர் உண்மையில் எப்படி முடிவுக்கு வரும் என்பதில் உலக அரங்கில் இன்னும் குழப்பமே நீடிக்கிறது.