விசாகப்பட்டினம் ரயில் நிலையம் அருகே நள்ளிரவில் நடைபாதையில் பெற்றோருடன் தூங்கிக் கொண்டிருந்த 4 வயது சிறுமி கடத்தப்பட்டுள்ளார். விஜயவாடாவைச் சேர்ந்த சையத் அப்துல் ஹபீஸ் கனி மற்றும் அவரது மனைவி சையத் சேஷம்மா ஆகியோர், கடைகளுக்கு தூபம் காட்டி தினக்கூலி அடிப்படையில் பிழைப்பு நடத்தி வருகின்றனர். இவர்கள் கடந்த மூன்று நாட்களுக்கு முன்பு பிழைப்புக்காக விசாகப்பட்டினம் வந்துள்ளனர். இரவு நேரத்தில் ரயில் நிலையம் எதிரே உள்ள பேருந்து நிறுத்தம் அருகேயுள்ள நடைபாதையில் தங்களது குழந்தையுடன் தூங்கிக் கொண்டிருந்தபோது ஒரு இளம்பெண் மற்றும் இளைஞரால் இந்த அதிர்ச்சிகரமான கடத்தல் சம்பவம் அரங்கேற்றப்பட்டுள்ளது.
இந்த கடத்தல் சம்பவம் குறித்து வழக்குப் பதிவு செய்த காவல்துறையினர், அப்பகுதியில் உள்ள சிசிடிவி கேமரா பதிவுகளை ஆய்வு செய்தனர். அதில், எஸ்.ராயவரம் பகுதியைச் சேர்ந்த பிரதிபா மற்றும் கரிவிடி பகுதியைச் சேர்ந்த உபேந்திரா ஆகிய இருவரும் ஸ்கூட்டியில் வந்து நள்ளிரவில் சிறுமியை ரகசியமாகக் கடத்திச் செல்வது தெளிவாகப் பதிவாகியுள்ளது. இந்த முக்கிய சிசிடிவி ஆதாரங்களை அடிப்படையாகக் கொண்டு, கடத்தலில் ஈடுபட்ட இருவரையும் காவல்துறையினர் தீவிரமாகத் தேடி வருகின்றனர்.