தேர்தல் களம் சூடுபிடித்துள்ள நிலையில், அதிமுக பொதுச்செயலாளர் எடப்பாடி பழனிசாமியின் விமர்சனங்களுக்கு முதல்வர் மு.க. ஸ்டாலின் ஓசூரில் நடைபெற்ற பிரச்சாரக் கூட்டத்தில் மிகக் கடுமையான பதிலடியைத் தந்துள்ளார். தமிழக உரிமைகளை திமுக மட்டுமே காக்க முடியும் என்று குறிப்பிட்ட அவர், கடந்த காலங்களில் எடப்பாடி பழனிசாமி மேற்கொண்ட நடவடிக்கைகள் மற்றும் அவரது மௌனம் குறித்து அடுக்கடுக்கான குற்றச்சாட்டுகளை முன்வைத்தார். குறிப்பாக, ராகுல் காந்தி குறிப்பிட்டது போல, மோடியால் தன்னை ஒருபோதும் கட்டுப்படுத்த முடியாது என்பதை முதல்வர் மீண்டும் ஒருமுறை மேடையில் உறுதிபடத் தெரிவித்தார்.
காரில் செல்லும்போது கிரிக்கெட் பார்த்தது தவறு என எடப்பாடி பழனிசாமி விமர்சித்ததற்குப் பதில் அளித்த ஸ்டாலின், “நான் கிரிக்கெட் பார்த்தது தவறல்ல, மாறாகத் தமிழ்நாட்டின் முதல்வராக இருந்துகொண்டு தூத்துக்குடி துப்பாக்கிச் சூடு சம்பவத்தைத் தொலைக்காட்சியில் பார்த்துதான் தெரிந்துகொண்டேன் என்று பழனிசாமி சொன்னதுதான் மிகப்பெரிய கேவலம்” எனச் சாடினார். மேலும், கூவத்தூர் விவகாரத்தைக் கோடிட்டுக் காட்டும் வகையில், காரில் செல்லும்போது கர்ச்சீப்பால் முகத்தை மூடிக்கொண்டு சென்றதுதான் அவமானம் என்றும், விளையாட்டுப் போட்டிகளை ரசிப்பதில் எவ்விதத் தவறும் இல்லை என்றும் அவர் வாதிட்டார்.
தமிழகத்தின் தொழில் வளர்ச்சிக்கு பாஜக அரசு முட்டுக்கட்டையாக இருப்பதாகக் குற்றம்சாட்டிய முதல்வர், குறிப்பாக ஓசூர் விமான நிலையத் திட்டத்தை மத்திய அரசு தடுப்பதாகத் தெரிவித்தார். தமிழ்நாட்டில் தற்போது 43,000 தொழிற்சாலைகள் இயங்கி வருவதைச் சுட்டிக்காட்டிய அவர், இத்தகைய வளர்ச்சித் திட்டங்களுக்குப் பாதிப்பு ஏற்படும்போது எடப்பாடி பழனிசாமி பாஜகவிடம் வாய் திறக்காமல் மௌனம் காப்பது ஏன் என்றும் கேள்வி எழுப்பினார். தமிழ்நாட்டின் உரிமைகளுக்காகக் குரல் கொடுக்கத் துணிவில்லாதவர் தன்னைப் பார்த்துக் கேள்வி கேட்பது வேடிக்கையாக இருப்பதாக அவர் விமர்சித்தார்.
இறுதியாகப் பிரதமர் மோடியின் சமீபத்திய உரையைக் கடுமையாக விமர்சித்த ஸ்டாலின், தேர்தல் நடத்தை விதிகள் அமலில் இருக்கும்போது அரசுச் சின்னங்களையும், தேசியக் கொடியையும் பின்னணியாக வைத்து அரசியல் பேசுவது அப்பட்டமான விதிமீறல் என்று சுட்டிக்காட்டினார். மேலும், வரும் ஐந்தாண்டுகளில் 35 லட்சம் மாணவர்களுக்கு விலையில்லா மடிக்கணினிகள் வழங்கப்படும் என்பது உள்ளிட்ட பல்வேறு வாக்குறுதிகளைத் தந்த அவர், தொகுதி மறுவரையறை மசோதா தோல்வி அடையும் என்ற அச்சத்தில் பாஜகவும் மோடியும் பதற்றத்துடன் பேசி வருவதாகவும் தனது உரையில் குறிப்பிட்டார்.