ஈரோடு மாவட்டம் மொடக்குறிச்சியில் தமிழக வெற்றிக் கழகத்தின் (தவெக) தலைமை ஒருங்கிணைப்பாளர் செங்கோட்டையன் செய்தியாளர்களைச் சந்தித்தார். அப்போது எடப்பாடி பழனிசாமிக்கு எதிராகக் கடும் விமர்சனங்களை முன்வைத்த அவர், இந்தியாவில் துரோகத்திற்காக ஒருவருக்கு நோபல் பரிசு வழங்க வேண்டுமென்றால் அது எடப்பாடி பழனிசாமிக்குத் தான் வழங்கப்பட வேண்டும் என்று சாடினார். மக்கள் தற்போது எடப்பாடி பழனிசாமி மீது மிகுந்த கொந்தளிப்பில் இருப்பதாகவும், வரும் காலங்களில் எடப்பாடி பழனிசாமி வீதியில் கூட நடமாட முடியாது என்றும் அவர் எச்சரித்தார்.
எடப்பாடி பழனிசாமியின் கடந்த கால அரசியல் குறித்துப் பேசிய செங்கோட்டையன், 1979-ஆம் ஆண்டிலிருந்து அவரது அரசியல் செயல்பாடுகளைப் பற்றிப் பேசத் தொடங்கினால் அவரால் அதைத் தாங்க முடியாது என்று குறிப்பிட்டார். “எப்படி என் இடத்திற்கு வந்தார், எந்த வகையில் தேர்தலில் நின்றார், எங்கெங்கே என்ன செய்தார்” என்பது போன்ற ரகசியங்களை வெளியே சொன்னால் எடப்பாடி பழனிசாமியின் அரசியல் முகம் அம்பலமாகும் என்றும், அத்தகைய நிலையை உருவாக்கினால் மக்கள் உரிய முடிவை எடுப்பார்கள் என்றும் அவர் ஆவேசமாகத் தெரிவித்தார்.
அமைச்சர் பதவிக்காகச் செங்கோட்டையன் கண்ணீர் விட்டு அழுதார் என்ற எடப்பாடி பழனிசாமியின் குற்றச்சாட்டிற்குப் பதிலடி கொடுத்த அவர், “இவர் எங்கே எனக்கு அமைச்சர் பதவி தருவது? சட்டமன்ற உறுப்பினர்களின் ஆதரவு இல்லாமல் இவர் எப்படி முதலமைச்சர் ஆகியிருக்க முடியும்?” என்று கேள்வி எழுப்பினார். தான் அன்றைய சூழலில் விட்டுக்கொடுக்காமல் இருந்திருந்தால் எடப்பாடி பழனிசாமி முதலமைச்சர் நாற்காலியில் அமர்ந்திருக்கவே முடியாது என்பதையும், அவரிடம் அரசியல் நாகரிகம் இல்லை என்பதையும் சுட்டிக்காட்டினார்.
தன்னிடமிருந்த சட்டமன்ற உறுப்பினர்களின் எண்ணிக்கை மற்றும் செல்வாக்கு குறித்து எடப்பாடி பழனிசாமிக்கு நன்கு தெரியும் என்று குறிப்பிட்ட செங்கோட்டையன், தான் மட்டும் அன்று ஆதரிக்காமலோ அல்லது கையெழுத்துப் போடாமலோ இருந்திருந்தால் எடப்பாடி பழனிசாமிக்கு அரசியல் வரலாற்றில் முதலமைச்சர் ஆகும் வாய்ப்பே கிடைத்திருக்காது என்றார். எடப்பாடி பழனிசாமியின் பேச்சுக்கள் வேதனை அளிப்பதாகவும், இதற்கெல்லாம் காலம் தான் சரியான பதில் சொல்லும் என்றும் கூறி தனது பேட்டியை நிறைவு செய்தார்.