மத்தியப் பிரதேச மாநிலம் சிவபுரி மாவட்டத்தில் உள்ள தேசிய நெடுஞ்சாலை (NH-46) அருகே, நபர் ஒருவரைத் தரையில் தள்ளி அவரது மார்பின் மீது கால் வைத்து ஒரு இளைஞர் மிரட்டல் விடுத்த சம்பவம் பெரும் பரபரப்பை ஏற்படுத்தியுள்ளது. இந்தத் தாக்குதல் சம்பவத்தை அந்த வழியாகப் பேருந்தில் சென்ற பயணி ஒருவர் தனது செல்போனில் வீடியோ எடுத்து சமூக வலைதளங்களில் பகிர, அது தற்போது வைரலாகி வருகிறது. தாக்குதல் நடத்திய இளைஞர் அந்தப் பகுதியைச் சேர்ந்த ஒரு அரசியல் பிரமுகர் என்று கூறப்படுகிறது.
வைரலாகி வரும் அந்த வீடியோவில், பட்டப்பகலில் நடுரோட்டில் ஒரு நபரை அந்த இளைஞர் ஆக்ரோஷமாகத் தாக்கி, கீழே தள்ளிவிட்டு அவரது மார்பில் காலை வைத்து மிதித்தபடி மிரட்டுகிறார். இதைக் கண்ட அங்கிருந்த பொதுமக்கள் அச்சமடைந்து உறைந்து போயினர். அந்த இளைஞரின் ஆக்ரோஷத்தைக் கண்டு அருகில் இருந்தவர்கள் யாரும் அவரைத் தடுக்கவோ அல்லது பாதிக்கப்பட்டவருக்கு உதவவோ முன்வராமல் வேடிக்கை பார்த்தது அந்த வீடியோவில் பதிவாகியுள்ளது.
இந்தச் சம்பவம் தொடர்பாக பாதிக்கப்பட்ட தரப்பில் இருந்து இதுவரை காவல்துறைக்கு அதிகாரப்பூர்வமாக எந்தப் புகாரும் அளிக்கப்படவில்லை. இருப்பினும், வீடியோ வைரலானதை அடுத்து சிவபுரி காவல்துறையினர் இந்த விவகாரத்தைக் கையில் எடுத்துள்ளனர். வீடியோவில் உள்ள நபரை அடையாளம் கண்டு, அவர் மீது சட்டப்படி கடுமையான நடவடிக்கை எடுக்கப்படும் என்று தேஹத் காவல் நிலைய ஆய்வாளர் விகாஸ் யாதவ் தெரிவித்துள்ளார். influence (செல்வாக்கு) காரணமாகவே நடவடிக்கை எடுக்கத் தாமதமாகிறது என்று சமூக வலைதளங்களில் எழுந்துள்ள புகார்களையும் போலீசார் கண்காணித்து வருகின்றனர்.