தமிழ்நாடு அரசின் டெல்லி சிறப்பு பிரதிநிதியாக வெங்கட நாராயணா என்பவர் நியமிக்கப்பட்ட விவகாரம், தற்போது தமிழக அரசியலில் பெரும் புயலைக் கிளப்பியுள்ளது. முதலமைச்சர் விஜய் தலைமையிலான தமிழக வெற்றிக் கழக அரசின் இந்த அதிரடி முடிவுக்கு, பல்வேறு தமிழ் அமைப்புகளும் சமூக வலைதளவாசிகளும் தங்களது கடுமையான எதிர்ப்புகளைப் பதிவு செய்து வருகின்றனர். தமிழ்நாட்டின் உரிமைகளையும், தமிழ் மக்களின் உணர்வுகளையும் ஆழமாகப் புரிந்து கொள்ளாத ஒரு வெளிமாநிலத்தவரை இத்தகைய முக்கியப் பதவிக்கு எப்படி நியமிக்கலாம் என்பதே இந்த எதிர்ப்பின் மையப்புள்ளியாக உருவெடுத்துள்ளது.
மத்திய அரசின் சட்ட மசோதாக்கள் மற்றும் திட்டங்கள் தமிழ்நாட்டிற்கு என்ன மாதிரியான தாக்கத்தை ஏற்படுத்தும் என்பதைக் கண்காணிப்பதும், மாநில அரசின் கோரிக்கைகளை மத்திய அமைச்சகங்களில் முன்னெடுத்துச் செல்வதும் தான் இந்த டெல்லி சிறப்பு பிரதிநிதியின் முக்கியப் பொறுப்பாகும். இத்தகைய உணர்வுப்பூர்வமான, மாநில சுயாட்சி மற்றும் உரிமைகள் சார்ந்த ஒரு பதவிக்கு, தமிழ்நாட்டின் அடிமட்டப் பிரச்சினைகளைத் தெரிந்த உள்ளூர் நபர் ஒருவரே தகுதியானவராக இருக்க முடியும். ஆனால், தவெக அரசு இந்த நியமனத்தில் தமிழ்நாட்டைச் சாராத ஒருவரைத் தேர்ந்தெடுத்துள்ளது தமிழர்களிடையே அதிருப்தியை ஏற்படுத்தியுள்ளது.
இந்த சர்ச்சை குறித்து விளக்கம் அளித்த தவெக அமைச்சர் நிர்மல்குமார், “வெங்கட நாராயணா கன்னடர் அல்ல, அவர் ஆந்திராவைச் சேர்ந்த தெலுங்கர்; கர்நாடகாவில் தொழில் செய்து வருகிறார்” என்று கூறியுள்ளார். மேலும், அவர் டெல்லியில் தான் பணியாற்றப் போகிறார் என்றும், கடந்த காலங்களில் தவெக தலைவருடன் இக்கட்டான சூழ்நிலைகளிலும் உறுதியாக நின்றவர் என்றும் அமைச்சர் நியாயப்படுத்தியுள்ளார். ஆனால், இந்த விளக்கம் “சப்பைக்கட்டு” என்று கூறி சமூக வலைதளங்களில் பொதுமக்கள் மற்றும் அரசியல் விமர்சகர்கள் அமைச்சர் நிர்மல்குமாரின் பதிலை முற்றிலுமாக நிராகரித்து வருகின்றனர்.
இங்கு முக்கியக் கேள்வி வெங்கட நாராயணா கன்னடரா அல்லது தெலுங்கரா என்பது அல்ல; தமிழ்நாட்டின் சார்பாகத் தேசியத் தலைநகரில் குரல் கொடுக்க, தமிழக அரசின் ஊதியத்தில் நியமிக்கப்படும் ஒரு பொறுப்பிற்குத் தகுதியான ஒரு தமிழர் கூடவா கிடைக்கவில்லை? என்பதுதான். அண்டை மாநிலங்களான கர்நாடகாவிலோ அல்லது ஆந்திராவிலோ இது போன்ற ஒரு முக்கியப் பதவிக்கு ஒரு தமிழரை நியமிக்க அந்தந்த மாநில அரசுகள் முன்வருமா என்ற நியாயமான கேள்வியும் தவெக அரசை நோக்கி அடுக்கடுக்காக எழுப்பப்பட்டு வருகிறது.
குறிப்பாக, கர்நாடகாவில் தொழில் செய்யும் வெங்கட நாராயணா, நாளை மேகதாது அணை விவகாரம் போன்ற இரு மாநிலப் பிரச்சினைகள் எழும்போது, தனது வணிக லாபத்தை விடுத்து தமிழக மக்களின் உணர்வுகளுக்காகச் செயல்படுவார் என்பதற்கு என்ன உத்தரவாதம் என்ற அச்சமும் எழுந்துள்ளது. டெல்லி சிறப்பு பிரதிநிதி என்பது வெறும் அலங்காரப் பதவி என அமைச்சர் கூறினாலும், அதனைத் தமிழகத்தைச் சேர்ந்த ஒருவருக்கே வழங்கியிருக்கலாம் என்பதே பலரின் வாதம். எனவே, தமிழர்களின் உணர்வுகளுக்கு மதிப்பளித்து, வெங்கட நாராயணாவின் நியமனத்தை தவெக அரசு உடனடியாகத் திரும்பப் பெற வேண்டும் என்ற கோரிக்கை தற்போது வலுத்து வருகிறது.