நாம் தமிழர் கட்சியின் 234 வேட்பாளர்களையும் ஒரே மேடையில் அறிமுகப்படுத்தும் பிரம்மாண்டமான “மக்களின் மாநாடு” வரும் பிப்ரவரி 21-ஆம் தேதி திருச்சியில் நடைபெற உள்ளது. கடந்த டிசம்பர் மாதம் முதற்கட்டமாக 100 வேட்பாளர்களை சீமான் அறிவித்திருந்த நிலையில், தற்போது அந்தப் பட்டியலில் சில முக்கிய மாற்றங்கள் செய்யப்பட இருப்பதாகத் தகவல்கள் வெளியாகியுள்ளன. குறிப்பாக, நட்சத்திர வேட்பாளர்கள் போட்டியிடும் தொகுதிகளிலும் மாற்றங்கள் இருக்கும் எனக் கூறப்படுவது அரசியல் வட்டாரத்தில் சலசலப்பை ஏற்படுத்தியுள்ளது.
ஏற்கனவே அறிவிக்கப்பட்ட வேட்பாளர்களை மாற்றும் இந்த முடிவு, தேர்தல் வியூகத்தின் ஒரு பகுதியா அல்லது கள நிலவரத்தைக் கருத்தில் கொண்ட பின்னடைவா என அரசியல் விமர்சகர்கள் கேள்வி எழுப்பி வருகின்றனர். எனினும், “மாற்றம் என்பது மக்களின் சிந்தனையில் உருவாக வேண்டும்” எனக் கூறும் சீமான், வலுவான வேட்பாளர்களைக் களமிறக்குவதில் உறுதியாக இருப்பதாகக் கட்சித் தரப்பில் கூறப்படுகிறது. இந்த திருச்சி மாநாடு, தவெக (TVK) உள்ளிட்ட புதிய அரசியல் வரவுகளுக்கு மத்தியில் நாம் தமிழர் கட்சியின் பலத்தைக் காட்டும் முக்கிய நிகழ்வாகப் பார்க்கப்படுகிறது. திருச்சி மாநாட்டில் 234 தொகுதிகளிலும் சரிபாதி இடங்களில் (117 இடங்கள்) பெண்கள் போட்டியிடுவார்கள் என்ற தனது கொள்கையை சீமான் மீண்டும் உறுதிப்படுத்தியுள்ளார். எந்தக் கட்சியுடனும் கூட்டணி வைக்காமல் தனித்துப் போட்டியிடும் முடிவில் மாற்றம் இல்லை என்றும் அவர் தெரிவித்துள்ளார்.