கோட்டைக்கு வந்த அழகிரி மகள் கயல்விழி.. நள்ளிரவில் விஜய்யிடம் இருந்து வந்த அந்த ஒரு போன் கால்…. அறிவாலயத்தை உலுக்கிய ரகசிய வியூகம்…!

தமிழக அரசியலில் எப்போதும் எதிர்பாராத திருப்பங்களுக்குப் பஞ்சமிருக்காது. அந்த வகையில், தமிழக முதல்வர் விஜய்யை சந்தித்து, அவருடைய தமிழக வெற்றிக் கழகத்தில் (தவெக) இணையவிருக்கிறார் முன்னாள் முதல்வர் மு.க.அழகிரியின் மகள் கயல்விழி. தந்தை அழகிரியின் முழு சம்மதத்துடனேயே இந்த முடிவு எடுக்கப்பட்டுள்ளதாகக் கூறப்படுகிறது. மறைந்த முன்னாள் முதல்வர் கருணாநிதியின் மறைவுக்குப் பிறகு, திமுகவில் மீண்டும் இணைய அழகிரி எடுத்த முயற்சிகள் யாவும் மு.க.ஸ்டாலின் குடும்பத்தினரின் எதிர்ப்பால் தோல்வியடைந்தன. பாஜக போன்ற மாற்றுத் திறப்புச் சக்திகள் தங்களை நோக்கி அழைத்தபோதும் அமைதி காத்த அழகிரி குடும்பம், தற்போது தவெக மூலம் திமுக தலைமைக்கு அரசியல் ரீதியான ‘செக்’ வைக்கத் திட்டமிட்டு வருவது அறிவாலய வட்டாரத்தை அதிர வைத்துள்ளது.

முன்னதாக, 2026 சட்டமன்றத் தேர்தல் நெருங்கிய சூழலில், அழகிரியின் மகள் கயல்விழியை திமுகவில் இணைத்து அழகிரிக்கு முக்கியத்துவம் கொடுக்கலாம் என கனிமொழி எம்பியே ஸ்டாலினிடம் சிபாரிசு செய்துள்ளார். ஆனால், ஸ்டாலின் தரப்பு இதில் அக்கறை காட்டாததால் அதிருப்தியடைந்த அழகிரி, “இனி எனக்காக யாரிடமும் சிபாரிசுக்கு போகாதே, அது உனது சுயமரியாதைக்கு அழகல்ல” என்று கனிமொழிக்கு அறிவுறுத்தியுள்ளார். இதன் தொடர்ச்சியாகவே, கயல்விழி வெளிப்படையாக விஜய்க்கு ஆதரவான மனநிலையை வெளிப்படுத்தத் தொடங்கினார். விஜய் முதல்வராகப் பதவியேற்ற விழாவில் பங்கேற்ற கயல்விழி, “மக்கள் மாற்றத்தை விரும்பியுள்ளனர்” என்று கூறி விஜய்யின் அரசியல் நகர்வுகளுக்குப் பச்சைக் கொடி காட்டினார்.

சமீபத்தில் கோட்டைக்கு வந்த கயல்விழி, முதல்வர் விஜய்யை சந்திக்க இயலாமல் அமைச்சர்களை மட்டும் பார்த்துவிட்டுத் திரும்பியுள்ளார். இந்தத் தகவல் அறிந்த முதல்வர் விஜய், அன்றிரவே அழகிரியைத் தொலைபேசியில் தொடர்புகொண்டு, “அண்ணே, நான் இல்லாத போது கயல் வந்துள்ளார். நான் சொல்கிறேன், அப்போது கயல் வரட்டும்” என்று பாசத்தோடு பேசியதாக தவெக தரப்பில் சொல்லப்படுகிறது. இந்த சந்திப்பு விரைவில் அதிகாரப்பூர்வமாக அரங்கேறி, கயல்விழி முறைப்படி தவெகவில் இணையவிருக்கிறார் என்பதுதான் தற்போதைய ஹாட் டாபிக்.

கயல்விழி தவெகவில் இணையும் பட்சத்தில், அவரை திருச்சி கிழக்குத் தொகுதியில் களம் இறக்க விஜய்யின் அரசியல் ஆலோசகர்கள் திட்டமிட்டு வருகின்றனர். ஏனெனில், அங்கு உதயநிதியின் நெருங்கிய நண்பரான அன்பில் மகேஸை களம் இறக்க திமுக திட்டமிட்டுள்ளதாம். உதயநிதியின் நண்பரைத் தோற்கடிக்க, திமுக குடும்பத்திலிருந்தே ஒருவரை நிறுத்துவதுதான் சரியான வியூகம் என தவெக நினைக்கிறது. இதற்குப் போட்டியாக கனிமொழியை களம் இறக்க திமுக தலைமை யோசித்தாலும், அண்ணன் அழகிரியின் மகளுக்கு எதிராகப் போட்டியிட கனிமொழி சம்மதிக்க மாட்டார் என்றே அவரது ஆதரவாளர்கள் கூறுகின்றனர். இதனால் திருச்சி கிழக்கு தொகுதி இப்போதே தமிழக அரசியலின் விவாதப் பொருளாக மாறியுள்ளது.