தமிழகத்தில் தமிழக வெற்றிக் கழகம் (தவெக) ஆட்சிப் பொறுப்பேற்ற இரண்டே மாதங்களில், முதல்வர் ஜோசப் விஜய் தலைமையிலான அரசு எடுத்து வரும் அதிரடி நடவடிக்கைகள் 90-களின் ஜெயலலிதா ஆட்சி முறையை நினைவுபடுத்துவதாக அரசியல் விமர்சகர்கள் கருத்து தெரிவித்து வருகின்றனர். பொதுவாக ஜெயலலிதா தன் மீதான விமர்சனங்களை சகித்துக் கொள்ளாமல் நள்ளிரவு கைதுகள், அவதூறு வழக்குகள் என அசுர வேக அரசியல் பழிவாங்கல்களை கையில் எடுப்பார். அதே பாணியில், தற்போது தவெக அரசை விமர்சிப்பவர்களை நள்ளிரவிலும், தேடித்தேடியும் கைது செய்யும் போக்கை முதல்வர் விஜய் கையில் எடுத்துள்ளது தமிழக அரசியலில் பெரும் விவாதத்தை ஏற்படுத்தியுள்ளது.
இதற்குச் சான்றாக, கடந்த ஜூன் மாதம் பொதுக்கூட்டத்தில் முதல்வர் விஜய் குறித்து அவதூறாகப் பேசியதாக திமுக எம்.எல்.ஏ-வும் முன்னாள் அமைச்சருமான அனிதா ராதாகிருஷ்ணன் முன்ஜாமீன் தள்ளுபடியான சில மணி நேரங்களிலேயே அதிரடியாகக் கைது செய்யப்பட்டார். நள்ளிரவு வரை நீடித்த இந்த விசாரணைக்கு பின் நீதிமன்றம் அவருக்கு நிபந்தனை ஜாமீன் வழங்கியதால் போலீசாரின் சிறை வைக்கும் திட்டம் தவிடுபொடியானது. மேலும், காவலில் இருந்தபோது தன்னை திமுகவிலிருந்து விலகி தவெகவில் இணையுமாறு போலீசார் வற்புறுத்தியதாக அனிதா ராதாகிருஷ்ணன் கூறிய குற்றச்சாட்டு பெரும் புயலைக் கிளப்பியுள்ளது. இதுமட்டுமன்றி, சமூக ஊடகங்களில் தவெக அரசை விமர்சித்த கிருஷ்ணகிரியைச் சேர்ந்த திமுக Gen Z பிரிவு ஒருங்கிணைப்பாளர் ஏ. அன்பானந்தம் நள்ளிரவில் கைது செய்ய முயன்றதும் பரபரப்பை கூட்டியுள்ளது.
இந்த அடுத்தடுத்த கைது நடவடிக்கைகளுக்கு திமுக கடும் கண்டனம் தெரிவித்துள்ளது. முதல்வர் விஜய் தமிழ்நாட்டில் ஒரு சினிமா பாணி போலீஸ் ராஜ்ஜியத்தை நடத்தி வருவதாகவும், இது விமர்சனங்களைத் தாங்க முடியாமல் நடுங்கும் ஒரு “ரீல்ஸ் அரசாங்கம்” என்றும் மு.க. ஸ்டாலின் மற்றும் உதயநிதி ஸ்டாலின் ஆகியோர் சாடியுள்ளனர். ஜெயலலிதா காலத்து அரசியல் ஆயுதங்களை முதல்வர் விஜய் கையில் எடுத்தாலும், பழிவாங்கும் நோக்கில் பாயும் போலீசாரின் வழக்குகளையும் கைதுகளையும் நீதிமன்றங்கள் அடுத்தடுத்து நிராகரிப்பதும், ரத்து செய்வதும் தவெக அரசுக்கு ஆரம்ப கட்டத்திலேயே ஏற்பட்டுள்ள பெரும் பின்னடைவாகக் கருதப்படுகிறது.