அமெரிக்காவின் பொருளாதார மற்றும் கடற்படை முற்றுகை நீக்கப்படும் வரை, ஈரானிய துறைமுகங்களுக்குச் செல்லும் மற்றும் அங்கிருந்து புறப்படும் அனைத்துக் கப்பல்களுக்கும் ஹார்முஸ் ஜலசந்தி (Strait of Hormuz) மூடப்பட்டிருக்கும் என ஈரான் அதிகாரப்பூர்வமாக அறிவித்துள்ளது. இந்தத் தடையை மீறி ஜலசந்திக்குள் நுழைய முயலும் எந்தவொரு கப்பலும் ‘எதிரி’ எனக் கருதப்பட்டுத் தாக்கப்படும் என்று ஈரானின் இஸ்லாமியப் புரட்சிகரப் பாதுகாப்புப் படை (IRGC) ஞாயிற்றுக்கிழமை கடும் எச்சரிக்கை விடுத்துள்ளது. முன்னதாக, இந்திய எண்ணெய் கப்பல்களான ‘ஜக் அர்னவ்’ மற்றும் ‘சன்மர் ஹெரால்டு’ ஆகியவற்றின் மீது ஈரான் படைகள் நடத்திய துப்பாக்கிச் சூடு சம்பவத்திற்கு இந்தியாவும், அமெரிக்க அதிபர் டிரம்பும் கடும் கண்டனம் தெரிவித்துள்ளனர். பாகிஸ்தானின் இஸ்லாமாபாத்தில் திட்டமிடப்பட்டிருந்த இரண்டாம் கட்ட அமைதிப் பேச்சுவார்த்தையை ஈரான் திட்டவட்டமாக மறுத்துள்ளதால், பிராந்தியத்தில் போர் மேகங்கள் சூழ்ந்துள்ளன.
ஈரானின் அணு ஆயுதத் திட்டம் மற்றும் ஹார்முஸ் ஜலசந்தி மீதான கட்டுப்பாடு தொடர்பான முதற்கட்டப் பேச்சுவார்த்தை தோல்வியடைந்ததைத் தொடர்ந்து, ஈரானின் உள்கட்டமைப்புகள் அனைத்தும் அழிக்கப்படும் என்று டிரம்ப் பகிரங்க மிரட்டல் விடுத்திருந்தார். இதற்குப் பதிலடியாகவே ஈரான் தற்போது ஜலசந்தியை மூடும் முடிவை எடுத்துள்ளது. ஈரான் மற்றும் அமெரிக்கா இடையே ஏற்பட்ட இரண்டு வார கால போர் நிறுத்தத்தில் ஏற்கனவே ஒரு வாரம் முடிவடைந்துள்ள நிலையில், மீதமுள்ள ஒரு வாரத்திற்குள் சுமூகமான தீர்வு எட்டப்படவில்லை எனில், மத்திய கிழக்கில் மீண்டும் ஒரு முழு அளவிலான போர் வெடிக்கக்கூடும் என்ற அச்சம் உலக நாடுகளிடையே எழுந்துள்ளது. குறிப்பாக, உலகளாவிய எரிசக்தி விநியோகத்தில் முக்கியப் பங்கு வகிக்கும் இந்த கடல் வழிப்பாதை முடக்கப்படுவது சர்வதேசப் பொருளாதாரத்திலும் பெரும் தாக்கத்தை ஏற்படுத்தும் என எதிர்பார்க்கப்படுகிறது.