மகாராஷ்டிரா மாநிலம் புனே மாவட்டம் போரூர் தாலுகாவில் உள்ள சரோலா கிராமத்தில் பேரதிர்ச்சியை ஏற்படுத்தும் படுகொலைச் சம்பவம் ஒன்று நடந்துள்ளது. அப்பகுதியைச் சேர்ந்த தீபக் பால் என்பவரின் மனைவிக்கும், அமர் பவார் (25) என்பவருக்கும் இடையே கடந்த 4 ஆண்டுகளாகத் தகாத உறவு இருந்து வந்துள்ளது. இதனால் இரு குடும்பத்தாருக்கும் இடையே அடிக்கடி தகராறு ஏற்பட்டு வந்துள்ளது. இந்நிலையில், கொலை நடப்பதற்கு 3 நாட்களுக்கு முன்பு அமர் பவார், தீபக் பாலின் மனைவியை அவரது சொந்த மாநிலமான உத்தர பிரதேசத்திற்கு அனுப்பத் திட்டமிட்டு சரோலா கிராமத்திற்கு அழைத்து வந்துள்ளார்.
இதனையறிந்த தீபக் பால், வியாழக்கிழமை இரவு 9 மணியளவில் அமர் பவாரிடம் தகராறில் ஈடுபட்டுள்ளார். வாக்குவாதம் முற்றிய நிலையில், தான் மறைத்து வைத்திருந்த கத்தியை எடுத்து அமர் பவாரின் கழுத்துப் பகுதியில் சரமாரியாகக் குத்தியுள்ளார். இதில் படுகாயமடைந்து அதிக ரத்தப்போக்கு ஏற்பட்டதால் அமர் பவார் சம்பவ இடத்திலேயே பரிதாபமாக உயிரிழந்தார். இந்தக் கொடூரத் தாக்குதல் சம்பவம் அருகில் இருந்த சிசிடிவி கேமராவில் அப்படியே பதிவாகியுள்ளது. இச்சம்பவம் குறித்து வழக்குப் பதிவு செய்த ராஜ்காட் போலீசார், கொலையாளி தீபக் பாலை கைது செய்து விசாரணை நடத்தி வருகின்றனர்.