கிருஷ்ணகிரியில் நடைபெற்ற திமுக கூட்டணி தேர்தல் பிரசாரக் கூட்டத்தில், முதலமைச்சர் ஸ்டாலின் பேசத் தொடங்கிய சிறிது நேரத்திலேயே காங்கிரஸ் தேசியத் தலைவர் மல்லிகார்ஜுன கார்கே பாதியில் கிளம்பியது பரபரப்பை ஏற்படுத்தியது. முன்னதாக கூட்டத்தில் கன்னட மொழியில் உரையாற்றிய கார்கே, தமிழகம் இந்தியாவின் வழிகாட்டும் விளக்காக இருப்பதாகவும், தென்மாநிலங்களை வஞ்சிக்க நினைக்கும் பாஜகவிற்கு இந்தத் தேர்தலில் மக்கள் தகுந்த பாடம் புகட்ட வேண்டும் என்றும் பேசினார். சமூக நீதி மற்றும் சமத்துவத்தைப் போற்றும் திமுக – காங்கிரஸ் கூட்டணி, தொகுதி மறுவரையறை போன்ற விவகாரங்களில் வெற்றி பெற்றுள்ளதாகவும் அவர் பெருமிதத்துடன் குறிப்பிட்டார்.
கார்கேவின் உரையைத் தொடர்ந்து ஸ்டாலின் பேசத் தொடங்கியபோது, தனக்கு அவசர வேலை இருப்பதால் புறப்பட அனுமதிக்குமாறு கார்கே கோரிக்கை விடுத்தார். இதனை மேடையிலேயே புன்னகையுடன் அறிவித்த முதலமைச்சர், தனது பேச்சைச் சற்று நேரம் நிறுத்திவிட்டு அவருக்குக் கைகுலுக்கி மகிழ்ச்சியுடன் வழியனுப்பி வைத்தார். பின்னர் மீண்டும் தனது உரையைத் தொடர்ந்த ஸ்டாலின், கிருஷ்ணகிரி வேட்பாளர்களை அறிமுகம் செய்து வாக்கு சேகரித்தார். கூட்டணிக் கட்சித் தலைவர்களுக்கிடையேயான இந்த பரஸ்பர மரியாதையும், தேர்தல் களத்தின் விறுவிறுப்பும் அங்கிருந்த தொண்டர்களிடையே நெகிழ்ச்சியை ஏற்படுத்தியது.