ஈரான் அணு ஆயுத உற்பத்தியைத் தடுப்பதாகக் கூறி அமெரிக்கா மற்றும் இஸ்ரேல் தொடங்கிய போர் ஒரு மாதத்தைக் கடந்தும் தீவிரமடைந்து வருகிறது. ஈரானின் முக்கியப் பகுதிகள் தாக்குதலுக்கு உள்ளாகியுள்ள நிலையில், அதற்குப் பதிலடியாக வளைகுடா நாடுகளில் உள்ள அமெரிக்க ராணுவத் தளங்களைக் குறிவைத்து ஈரான் தாக்குதல் நடத்தி வருகிறது. குறிப்பாக துபாய், சவுதி அரேபியா, பஹ்ரைன் போன்ற நாடுகளில் உள்ள ராணுவக் கட்டமைப்புகள் பெரும் அச்சுறுத்தலுக்கு உள்ளாகியுள்ளன. இந்த மோதலால் உலகளாவிய விநியோகச் சங்கிலி சிதைந்து, சர்வதேச அரசியலில் பெரும் பதற்றம் நிலவி வருகிறது.
உலகின் மிக முக்கியமான எண்ணெய் போக்குவரத்துப் பாதையான ஹார்முஸ் நீரிணையை (Strait of Hormuz) ஈரான் தனது கட்டுப்பாட்டில் கொண்டு வந்துள்ளதால், இந்தியா உள்ளிட்ட பல நாடுகளுக்கு கச்சா எண்ணெய் கிடைப்பதில் கடும் சிக்கல் ஏற்பட்டுள்ளது. இஸ்ரேல் மற்றும் அமெரிக்காவிற்கு ஆதரவான நாடுகளின் கப்பல்கள் இந்த வழியாகச் செல்ல ஈரான் அனுமதி மறுப்பதோடு, மீறிச் செல்லும் கப்பல்கள் மீது தாக்குதலும் நடத்தி வருகிறது. இதன் நேரடி விளைவாக இந்தியாவில் பெட்ரோல், டீசல் விலை உயர்ந்துள்ளதுடன், சமையல் எரிவாயு தட்டுப்பாடும் ஏற்பட்டுள்ளது. இதனால் உணவகங்கள் மூடப்படும் நிலைக்குத் தள்ளப்பட்டு, உணவுப் பொருட்களின் விலையும் கிடுகிடுவென உயர்ந்து மக்களின் இயல்பு வாழ்க்கை முடங்கியுள்ளது.
இந்த இக்கட்டான சூழலில் செய்தியாளர்களைச் சந்தித்த அமெரிக்க அதிபர் டொனால்ட் ட்ரம்ப் அதிரடியான கருத்துகளை முன்வைத்துள்ளார். ஹார்முஸ் நீரிணையில் சிக்கியுள்ள நாடுகளுக்கு இரண்டு தீர்வுகளை அவர் முன்மொழிந்தார். “எங்களிடம் தாராளமாக கச்சா எண்ணெய் உள்ளது, தேவையான நாடுகள் அதை அமெரிக்காவிடமிருந்து பெற்றுக்கொள்ளலாம்” எனக் குறிப்பிட்ட அவர், ஹார்முஸ் நீரிணை விவகாரத்தில் இனி அமெரிக்கா தலையிடாது என்பதையும் தெளிவுபடுத்தினார். “நாடுகள் தங்களின் தைரியத்தை வரவழைத்துக் கொண்டு நேரடியாகச் சென்று அந்தப் பாதையைக் கைப்பற்ற வேண்டும்; மற்றவர்களுக்காக அங்கே காவல் காக்க இனி அமெரிக்கா இருக்காது” என்று அவர் கூறியிருப்பது, சர்வதேச நாடுகளிடையே பெரும் விவாதத்தையும் அதிர்ச்சியையும் ஏற்படுத்தியுள்ளது.