தமிழ்நாட்டில் புதிய அரசு பொறுப்பேற்றுள்ள சூழலில், பெண்களிடையே பெரும் வரவேற்பைப் பெற்ற மகளிர் உரிமைத் தொகை திட்டத்தில் சில முக்கிய நிர்வாக மாற்றங்களைச் செய்ய முதலமைச்சர் ஜோசப் விஜய் தலைமையிலான அரசு திட்டமிட்டுள்ளது. முந்தைய ஆட்சியில் கொண்டு வரப்பட்ட புதுமைப் பெண், தமிழ்ப் புதல்வன், விடியல் பயணம் போன்ற நலத்திட்டங்கள் தற்போதும் தொய்வின்றித் தொடர்ந்தாலும், மகளிர் உரிமைத் தொகை திட்டத்தை முழுமையாக மறுசீரமைத்து, தகுதியானவர்களுக்கு மட்டுமே மாதந்தோறும் 2,500 ரூபாய் கிடைக்க வழிவகை செய்ய அரசு பூர்வாங்கப் பணிகளைத் தொடங்கியுள்ளது.
இந்த மறுசீரமைப்பில் மிக முக்கிய மாற்றமாக வயது வரம்பு அமையவுள்ளது. முந்தைய திமுக ஆட்சியில் 60 வயதுக்கு மேற்பட்ட பெண்களும் இத்திட்டத்தின் கீழ் பயன் பெற்று வந்த நிலையில், தற்போதைய அரசின் தேர்தல் வாக்குறுதியின்படி 60 வயதுக்கு மேற்பட்டவர்கள் மகளிர் உரிமைத் தொகை பெற தகுதியற்றவர்களாக மாறுவார்கள். அவர்களுக்குப் பதிலாக, அவர்கள் முதியோர் ஓய்வூதியத் திட்டத்தின் கீழ் விண்ணப்பித்து மாதாந்திர தொகையைப் பெற்றுக் கொள்ளுமாறு அறிவுறுத்தப்படுவார்கள். இதன் மூலம் மகளிர் உரிமைத் தொகையானது 60 வயதுக்குட்பட்ட தகுதியான பெண்களுக்கு மட்டுமே பிரத்யேகமாக வழங்கப்படும்.
திட்டத்தில் எந்தவொரு முறைகேடும் நடந்துவிடக் கூடாது என்பதில் முதலமைச்சர் விஜய் உறுதியாக இருக்கிறார். இதற்காகப் புதிய விதிமுறைகள் மற்றும் நிபந்தனைகளை அரசு வகுத்து வருகிறது. இனிவரும் காலங்களில் விண்ணப்பிக்கும் புதிய பயனாளிகள் அனைவரும் இந்த புதிய விதிகளின் அடிப்படையிலேயே தேர்வு செய்யப்படுவார்கள். உண்மையான ஏழை மற்றும் நடுத்தர குடும்பங்களைச் சேர்ந்த தகுதியான பெண்களுக்கு மட்டுமே இந்த 2,500 ரூபாய் போய்ச் சேர வேண்டும் என்ற நோக்கில் அரசு இந்த கடுமையான சீரமைப்பைக் கையில் எடுத்துள்ளது.
இந்தத் தகுதிப் பட்டியலைத் துல்லியமாகத் தயாரிக்க, நவீனத் தொழில்நுட்பத்தைப் பயன்படுத்த அரசு முடிவெடுத்துள்ளது. இதற்கென பிரத்யேக ஆன்லைன் தரவுத் தொகுப்புகள் ஒருங்கிணைக்கப்பட உள்ளன. விண்ணப்பதாரர்களின் தகவல்கள், அரசிடம் உள்ள இதர அதிகாரப்பூர்வத் தரவுகளுடன் ஒப்பிட்டு சரிபார்க்கப்பட்டு, தகுதியானவர்கள் மட்டுமே தானியங்கி முறையில் கண்டறியப்படுவார்கள். மோசடியாக யாரும் இத்திட்டத்தில் பயன் பெறுவதைத் தடுக்கும் நோக்கில், விரைவில் இந்த அதிரடி நிர்வாக மாற்றங்கள் நடைமுறைக்கு வரவுள்ளன.